საქართველოს პრეზიდენტმა გიორგი მარგველაშვილმა და პირველმა ლედიმ მაკა ჩიჩუამ რიოს ოლიმპიადიდან დაბრუნებული ქართველი ოლიმპიელები სასახლეში მიიღეს. საქართველოს პრეზიდენტმა ქართველ ოლიმპიელებს ღირსების ორდენები გადასცა. პრეზიდენტის ინიციატივით, “რიო 2016-ის“ ზაფხულის ოლიმპიურ თამაშებზე მოპოვებული გამარჯვებისა და მიღწეული წარმატებისათვის, ქართული სპორტის საერთაშორისო ავტორიტეტის ამაღლების საქმეში შეტანილი განსაკუთრებული წვლილისათვის ღირსების ორდენით დაჯილდოვდნენ: ვლადიმერ ხინჩეგაშვილი -ოლიმპიური ჩემპიონი თავისუფალი სტილით ჭიდაობაში, ლაშა ტალახაძე - ოლიმპიური ჩემპიონი ძალოსნობაში, ვარლამ ლიპარტელიანი - ოლიმპიური პრიზიორი ძიუდოში, ლაშა შავდათუაშვილი - ოლიმპიური პრიზიორი ძიუდოში, შმაგი ბოლქვაძე - ოლიმპიური პრიზიორი ბერძნულ-რომაული სტილით ჭიდაობაში,, ირაკლი თურმანიძე - ოლიმპიური პრიზიორი ძალოსნობაში, გენო პეტრიაშვილი - ოლიმპიური პრიზიორი თავისუფალი სტილით ჭიდაობაში. პრეზიდენტმა ოლიმპიელებს დასახული მიზნების მიღწევა და მომავალ ასპარეზობებში წარმატებები უსურვა. „მინდა მადლობა გითხრათ ქართველი ხალხის სახელით. საქართველოს ჰიმნი, თითოეული ნოტი ამ ჰიმნისა, იყო ათიათასობით ჩვენი თანამოქალაქის აღტაცებული გულისცემა. ეს თქვენ გააკეთეთ და მადლობა მინდა გითხრათ ამისათვის. ჩვენ ვაგრძელებთ შეჯიბრებებს. ჩვენ ვაგრძელებთ მსოფლიოსთვის იმის ჩვენებას, რომ ქართული გენი, ქართული უნარი, ჩვენი ჟინი და ჩვენი ძალა არ არის მხოლოდ დამოკიდებული იმაზე, რომ ვიყოთ ყველაზე დიდი და ყველაზე მასშტაბური ქვეყანა, არამედ დამოკიდებულია იმ უნარებზე, რაც თითოეულ თქვენთაგანში დევს. ეს დღეები თქვენთან ვიყავი რიოშიც, შემდეგ აქედანაც გგულშემატკივრობდით და ვიცი, რა რთულ ვითარებაში ასპარეზობდით და რა დიდი პასუხისმგებლობა იყო თქვენს კისერზე. ჩვენი გუნდი იყო მართლაც გამორჩეული. განსაკუთრებულ სილამაზეს სძენდა ჩვენს გუნდს, დედაშვილის საოცარი დუეტი. მადლობა მინდა ვუთხრა ასევე პარაოლიმპიელებს იმ დიდი გამარჯვებისთვის, რომლითაც მათ პარაოლიმპიადაში მონაწილეობის უფლება მოიპოვეს და დარწმუნებული ვარ კიდევ უფრო დიდი წარმატებები ექნებათ. თქვენთან ერთად ვარ, თქვენთან ერთად მიხარია, თქვენთან ერთად განვიცდი წაგებას და ძალიან დიდი იმედი მაქვს, რომ ჩვენი ერთად ყოფნა და თანამშრომლობა მომავალშიც გაგრძელდება იმ გამარჯვებებით, რომელიც ჩვენი ქვეყნის თითოეულ მოქალაქეს აღაფრთოვანებს. გმადლობთ თქვენი სამსახურისთვის! “- აღნიშნა საქართველოს პრეზიდენტმა ოლიმპიელებისადმი მიმართვაში. საქართველოს ოლიმპიურმა კომიტეტმა კი, საქართველოს პრეზიდენტსა და პირველ ლედის ოლიმპიადაში მონაწილეობის სერთიფიკატები გადასცა. საზეიმო მიღებას ქართველ ოლიმპიელებთან ერთად, პარაოლიმპიელებიც დაესწრნენ, რომლებიც სექტემბერში დაგეგმილ პარაოლიმპიადაზე 5 სპორტსმენით იქნებიან წარმოდგენილნი.