ბათუმში, ევროპის მოედანზე აჭარაში დამზადებული სუვენირების გამოფენა/გაყიდვა გაიმართა. პროექტში ტრადიციული რეწვის 20-ზე მეტი ოსტატი იყო ჩართული.
“საქართველოს რეწვის ასოციაცია“ შექმნილ სუვენირებს არამხოლოდ აჭარაში, არამედ ქვეყნის სხვა ქალაქებშიც გაყიდის. უახლოეს მომავალში დაგეგმილია გამოფენა–გაყიდვის გახსნა თბილისშიც.
მიმდინარე წელს პირველად, ტრადიციული რეწვის ოსტატებს აჭარის განათლების, კულტურისა და სპორტის სამინისტრომ პრაქტიკული დახმარება გაუწია პროდუქციის შექმნის, წარმოებისა და მარკეტინგის დარგში სწავლებაში. თანამშრომლობის ამ გზით სამინიტრო ცდილობს გაზარდოს ხალხური რეწვის სექტორის ეკონომიკიური სიცოცხლის უნარიანობა.
“ ჩვენი მიზანია დავეხმაროთ შექმნან პროდუქტი, რომელიც იქნება ყველასათვის მიმზიდველი და ხელმისაწვდომი. ვფიქრობ, შედეგს მივაღწიეთ, ბევრი ნივთი გაიყიდა და გვაქვს სურვილი სახელმწიფო უწყებებმა და კომპანიებმა სასაჩუქრე/ტურისტული პაკეტები ადგილზე შექმნილი ნივთებით დააკომპლექტონ“- აღნიშნა აჭარის განათლების, კულტურისა და სპორტის მინისტრის მოადგილე-ნათია სირაბიძემ.
რაც შეეხება შექმნილი ნივთების ღირებულებას, გამომდინარე იქიდან, რომ სუვენირები ხელნაკეთია და არა მასობრივი წარმოების, ფასი ხელმისაწვდომია. ფასების შედგენისას გათვალისწინებული იქნა ოსტატების შრომა და მასალა. ამავდროულად, არის დიდი შანსი, რომ ოსტატებმა მალევე დაიმკვიდრონ თავი ბაზარზე. პროექტის ხელმძღვანელების თქმით, მაღალი ფასი აფრთხობს კლიენტს, ხოლო დაბალი აუფასურებს, ამიტომ ფასი მოთხოვნის შესაფერისი იქნება.
პროექტი აჭარის განათლების, კულტურისა და სპორტის სამინისტროს დაფინანსებით განხორციელდა.