ადვოკატის მტკიცებით, ფარული ჩანაწერების საქმეზე ბრალდებულ სამ პირთან, საპროცესო შეთანხმების ოქმები ხელმოწერილია. ირაკლი ფხალაძის ადვოკატმა ნანა ფილაურმა დღევანდელი პროცესის დასრულების შემდეგ ჟურნალისტებს განუცხადა, რომ გელა ღურწკაიასთან, ნიკოლოზ ხაჭაპურიძესთან და ინგა ჩატოიანთან საპროცესო შეთანხმების ოქმზე ხელმოწერები უკვე გაკეთებულია.
„იმის გათვალისწინებით, რომ სამ ბრალდებულთან მიმართებაში საპროცესო შეთანხმებები ისევ დღის წესრიგშია, რა თქმა უნდა, მოლოდინი იმისა, რომ საპროცესო შეთანხმებები გაამყაროს მტკიცებულებებით პროკურატურამ ორი ბლადებულის ჯამალაშვილისა და ფხალაძის მიმართ, რა თქმა უნდა ეს მოლოდინი ისევ არსებობს. საპროცესო შეთანხმება ბრალდებისთვის ყველაზე მოქნილი, მოხერხებული მეთოდია რათა დაუდასტურდეს ამ ორ პირს ბრალეულობა. სრული სიზუსტით ვიცი, რომ სამივე პირთან, გელა ღურწკაიასთან, ნიკოლოზ ხაჭაპურიძესთან და ინგა ჩატოიანთან საპროცესო შეთანხმების ოქმზე ხელმოწერები გაკეთებულია“, - განაცხადა ნანა ფილაურმა.
რაც შეეხება პროკურატურის პოზიციას, ლაშა კოტრიკაძემ დღევანდელი სასამართლო პროცესის დასრულების შემდეგ განაცხადა, რომ ე.წ. ფარული ჩანაწერების საქმეზე ბრალდებულ სამ პირთან საპროცესო შეთანხმების გაფორმებაზე მოლაპარაკებები აღარ მიმდინარეობს.
„საპროცესო შეთანხმებაზე მოლაპარაკება მიმდინარეობდა, თუმცა გარკვეული დეტალები დასაზუსტებელი იყო, რაც ამ ეტაპისთვის ვერ დაზუსტდა. აქედან გამომდინარე, საპროცესო შეთანხმებები ამ ეტაპზე მიღწეული არ არის და ამ ეტაპზე არც მოლაპარაკებები მიმდინარეობს“, - განაცხადა ლაშა კოტრიკაძემ.
