„ადამიანის უფლებათა ცენტრი“ არასრულწლოვანი ორსული გოგონას გაუპატიურების საქმის ეფექტურ და დროულ გამოძიებას მოითხოვს.
ორგანიზაციაში ამბობენ, რომ სამართალდამცველი ორგანოები მომხდარზე არაეფექტურად რეაგირებენ.
ცენტრს დახმარების თხოვნით მარნეულის მუნიციპალიტეტში მცხოვრები 16 წლის გოგონას მშობლებმა მიმართეს. მათი ინფორმაციით, 8 ივლისს არასრულწლოვანი ორსული გოგონა მეუღლის 47 წლის ნათესავმა გააუპატიურა.
მომხდარზე გამოძიება დაწყებულია. ცენტრის ინფორმაციით, დაიკითხა პირი, რომელმაც დანაშაული აღიარა. ოჯახის განცხადებით, საგამოძიებო უწყების მიერ დაინიშნა ექსპერტიზა, დაჩქარებული წესით დასკვნის მომზადების მოთხოვნით, თუმცა დასკვნა დღემდე არ არის საგამოძიებო უწყებაში წარდგენილი.
„ადამიანის უფლებათა ცენტრში“ აცხადებენ, რომ დამნაშავე ისევ დაუსჯელია და არსებობს მისი მიმალვის საფრთხე.
