მთავარი პროკურატურის ინფორმაციით, გამამტყუნებელი განაჩენის გადასინჯვის მოთხოვნით 1200-მდე განცხადება-საჩივარია წარდგენილი. თუმცა, ამ ეტაპზე სამი მსჯავრდებულის საქმეების ხელახალი გადასინჯვის პროცედურა იქიდან გამომდინარე დაიწყო, რომ არსებობდა საკმარისი მტკიცებულებები.
სპიკერ-პროკურორ კოკა კაციტაძის განცხადებით, მსჯავრდებულები იოსებ ჯანდიერი, თემურ სალაყაია და ანდრო ჩხიკვიშვილის საქმესთან დაკავშირებით პროკურატურა ხელახალ სრულყოფილ და ობიექტურ გამოძიებას აწარმოებს.
„1200-მდე განცხადება-საჩივარი შემოვიდა, რომელიც გამამტყუნებელი განაჩენის გადასინჯვას ეხება. ის საქმეები იმის გამო შეირჩა, რომ საკმარისი მტკიცებულებები არის შეკრებილი. ასევე მოპოვებულია ახალი ფაქტები და ახალი გარემოებები და მტკიცებულებები, რომლებმაც საფუძველი მოგვცა ახლადგამოვლენილი გარემოებით მივმართოთ სასამართლოს. კანონში შეტანილი ცვლილება არ გულისხმობს, რომ პროკურორების, მოსამართლეების და გამომძიებლების შეფასება მოხდეს, შესაბამისად, თუ გამოიკვეთება განზრახ მონაწილეობა მოსამართლის, პროკურორის ან გამომძიებლის, მოხდება მათი სისხლის სამართლებრივი პასუხისმგებლობის საკითხის აღძვრა“, - განაცხადა კოკა კაციტაძემ.
