პირადი ცხოვრების საქმეზე სამ ბრალდებულთან სავარაუდოდ საპროცესო შეთანხმება გაფორმდება. პროკურორის ინფორმაციით, მოლაპარაკება საპროცესო გარიგებაზე მიმდინარეობს ინგა ჩატოიანთან, ნიკოლოზ ხაჭაპურიძესთან და გელა ღურწკაიასთან, თუმცა ინგა ჩატოიანის მიმართ აღკვეთის ღონისძიებად პატიმრობა არ არის გამოყენებული შესაბამისად, ამ გადაწყვეტილების შედეგად საქმე შეწყდება და პატიმრობაში მყოფი დანარჩენი ორი პირი გათავისუფლდება.
სხვა ბრალდებულების ადვოკატები პროკურატურას ადანაშაულებენ და აცხადებენ, რომ საპროცესო გარიგებების გაფორმება საგამოძიებო უწყებას, სხვა ბრალდებულების საწინააღმდეგოდ ჩვენებების მოპოვებისთვის სჭირდება.
„დღეს ჯამალაშვილი არის უკანონო პატიმარი. არც ერთი მტკიცებულება არ გააჩნია სახელმწიფო ბრალდებას. უბრალოდ გამოკეტილი ჰყავთ პიროვნება. ერთადერთი დაზარალებულის ჩვენება იყო წინა სასამართლო სხდომაზე და სასამართლომ ისიც დაუშვებლად სცნო,“-გიორგი ფოფხაძემ.
აღნიშნულ ფაქტს უარყოფს საქმის პროკურორი.
"ესეთ ფაქტს კატეგორიულად არ ვადასტურებ, რასაც ადვოკატები ამბობენ. საპროცესო შეთანხმება ვისთანაც მიმდინარეობს ჩვეულებრივად ისინი აღიარებენ დანაშაულს. ხოლო რაც შეეხება ირაკლი ფხალაძეს, მასთან ამ ეტაპზე საპროცესო შეთანხმება არ მიმდინარეობს. მოლაპარაკება მიმდინარეობს ინგა ჩატოიანთან, ნიკოლოზ ხაჭაპურიძესთან და გელა ღურწკაიასთან. სამივე მათგანი აღიარებს დანაშაულს. არსებითი განხილვა უნდა გაგრძელდეს და ვინ ვის წინააღმდეგ იძლევა ჩვენებას და ასევე რა შინაარსის მტკიცებულებები გვაქვს ვერ გეტყვით გასაგები მიზეზების გამო,“-განაცხადა პროკურორმა ლაშა კოტრიკაძემ.
დღეს მხარეებმა პროცესზე შესავალი სიტყვები წარადგინეს. სხდომა პირადი ცხოვრების კონფიდენციალურობის არგუმენტით მედიისათვის დახურული იყო.
