სწრაფმავალი გზები ორნახევარჯერ მეტი კეთდება, ვიდრე კეთდებოდა და 14%-ით უფრო იაფად იგება, - ამის შესახებ ყოფილმა პრემიერ-მინისტრმა ბიძინა ივანიშვილმა დღეს მედიასთან შეხვედრაზე განაცხადა.
”უნდა ნახოთ იუსტიციის სამინისტროს მიერ დახარჯული თანხები ერთ კვადრატულ მეტრზე, რამდენად იაფად და ხარისხიანად შენდება. აქვე გავიხსენებდი სწრაფმავალ გზებს, რომელიც ორ ნახევარჯერ მეტი კეთდება, ვიდრე კეთდებოდა და 14%-ით უფრო იაფად იგება. ეს 14% 4 წლის განმავლობაში დაახლოებით, 140 მილიონ ლარს შეადგენს. დაახლოებით, მილიარდი დაიხარჯა ამ სწრაფმავალი გზების მშენებლობაზე”, - განაცხადა ივანიშვილმა.
მისივე თქმით, სააკაშვილი საკუთარ თავს დავით აღმაშენებელს ადარებდა, რაც უხერხულია.
„მმართველობის ის სტილი, რაც გახლდათ სააკაშვილის, რომ მედია იყო მონოპოლიზებული, ვირტუალურ სამყაროს გვიხატავდნენ ყველა ტელევიზიიდან, ხან სახურავებიდან გვესაუბრებოდა ხან მღვიმეებიდან, აღწერდა სიტუაციას, რომ საოცარი აღმშენებლობა მიდიოდა. დავით აღმაშენებლს ედრებოდა. წარმოგიდგენიათ, როგორი თავხედობაა? უკაცრავად, ჯერ გაბედო და წარმატებულ პრეზიდენტს შეედარო და მეორე უმეცრებაა, როგორ შეიძლება დღევანდელი მშენებლობის ტემპები შეადარო მე-11 მე12 საუკუნეს“, - განაცხადა ივანიშვილმა.