ENG / RUS       12+

ზვიად ძიძიგური: მინდა, საქართველომ არჩევანი რუსეთთან ურთიერთობის დარეგულირებაზე გააკეთოს

რესპოდენტის შესახებ

"ეროვნული საბჭოს" მერობის კანდიდატის, ზვიად ძიძიგურის შეფასებით, თვითმმართველობის არჩევნებში ოპოზიციას გამარჯვების შანსი მხოლოდ იმ შემთხვევაში აქვს, თუ თბილისელები არჩევნებზე წასვლას არ დაიზარებენ. გამარჯვების შემთხვევაში ძიძიგური ამომრჩეველს რიგგარეშე საპრეზიდენტო და საპარლამენტო არჩევნების "დღესვე ჩატარებას" ჰპირდება.

აღსანიშნავია ის ფაქტიც, რომ საქართველოში ბიშკეკის სცენარის განხორციელების შესახებ "ეროვნული საბჭოს" მუქარა ძალაში აღარაა. ძიძიგურის განცხადებით, საქართველოს ხელისუფლების შესაცვლელად მხოლოდ ერთი, არჩევნებით შეცვლის გზა დარჩა.

აღნიშნულ საკითხებთან დაკავშირებით "ჯი-ეიჩ-ენი" "ეროვნული საბჭოს" მერობის კანდიდატს, ზვიად ძიძიგურს ესაუბრა.


_ ბატონო ზვიად, თვითმმართველობის არჩევნებამდე რამდენიმე დღე დარჩა. როგორ შეაფასებდით წინასაარჩევნო გარემოს? გამარჯვების რა შანსი აქვს ოპოზიციას?

_ წინასაარჩევნო კამპანიის ფარგლებში ძალიან მნიშვნელოვანია, საინფორმაციო ველში რამდენადაა ოპოზიცია წარმოდგენილი. "ეროვნულმა საბჭომ" საინფორმაციო ქრონომეტრაჟი გააკეთა და მინდა გითხრათ, რომ კატასტროფული მდგომარეობაა. ბოლო 10 დღის განმავლობაში ტელეკომპანია "რუსთავი 2"-ის 9-საათიან კურიერში ხელისუფლების მერობის კანდიდატს, გიგი უგულავას, 12 წუთი და 45 წამი და ზვიად ძიძიგურს 1 წუთი და 3 წამი აქვს დათმობილი. "იმედის" 8-საათიანი ქრონიკაში კი უგულავას - 10 წუთი და 45 წამი ეთმობა და ძიძიგურს - 1 წუთი 3 წამი. ეს დისკრიმინაციაა. ეს არის კანდიდატების არათანაბარ მდგომარეობაში ჩაყენება, მაგრამ ამის მიუხედავად, მიმაჩნია, რომ თუ თბილისელები არჩევნებში მასიურად მონაწილეობის გადაწყვეტილებას მიიღებენ, ხელისუფლების გამარჯვების შანსი ნაკლებია.

საპრეზიდენტო არჩევნების დროს, როცა ლევან გაჩეჩილაძე თბილისში კენჭს იყრიდა, ნახევარი მილიონი ადამიანი გამოვიდა ნაციონალური მოძრაობიდან და სააკაშვილი "ბეჭებზე დადო". ამის გაკეთება შეუძლიათ დღესაც თბილისელებს. თუ დღეს ისინი ამ გადაწყვეტილებას მიიღებენ, ცენტრალური ხელისუფლებას ვადამდელი საპრეზიდენტო და საპარლამენტო არჩევნების გზით დღესვე შევცვლით.

_ თუმცა კულუარებში საუბრობენ, რომ მერისა და საკრებულოს თავმჯდომარის თანამდებობები უკვე გადანაწილდა. კერძოდ, მერი გიგი უგულავა გახდება, საკრებულოს თავმჯდომარე კი "ქრისტიან-დემოკრატიული მოძრაობის" კანდიდატი ინგა გრიგოლია...

_ რამდენად იქნება გრიგოლია საკრებულოს თავმჯდომარე და უგულავა მერი, არ ვიცი, მაგრამ, რა თქმა უნდა, ხელისუფლებას თავისი სასურველი სქემები აქვს. თუმცა რა სიტუაცია იქნება რეალურად, ეს თბილისისა და საქართველოს მოსახლეობამ უნდა გადაწყვიტოს.

120-150 ათასამდე ხმა აქვს ხელისუფლებას თავის გაყალბებებით, დახურული უბნებით, ჯარით, პოლიციით და ყველა ადმინისტრაციული რესურსით. ამაზე მეტ ხმას ის ვერ მიიღებს. თუ თბილისში არჩევნებზე 400-500 ათასი ადამიანი გამოვიდა, ასეთ შემთხვევაში ოპოზიცია გამარჯვებულია. ამიტომ ყველაფერი ბოლო დღეებსა და თბილისელებზეა დამოკიდებული.

_ "ეროვნული საბჭო" ამომრჩევლის გაყალბებისგან ხმების დაცვას რა მეთოდებით ჰპირდება?

_ გაყალბება პრივატული პროცესი არ არის, ეს მასიური პროცესია. როგორც კი არჩევნები გაყალბდება, საპროტესტო აქციებს დავიწყებთ, გამოვალთ და დავიცავთ ჩვენს ხმებს.

_ თუმცა თუ გავითვალისწინებთ იმას, რომ ოპოზიციის ბოლო საპროტესტო აქციაზე მოსახლეობის ძალიან მცირე ნაწილი მოვიდა, როგორ ფიქრობთ, ბატონო ზვიად, მოახერხებს ოპოზიცია ხალხის ქუჩაში კვლავ გამოყვანას?

_ არჩევნების გაყალბება ყველა ადამიანს ეხება და ამიტომ ყველა თავს ვალდებულად მიიჩნევს, გამოვიდეს. ამიტომ იყო იპოდრომზე ასობით ათასი ადამიანი, რადგან მაშინაც გააყალბეს არჩევნები და ხალხს შეურაცხყოფა მიაყენეს. რაც შეეხება გიორგობის აქციას, საკმაოდ დიდი რაოდენობა იყო. მეტროსადგურ "ვარკეთილთან" 2000-2500 კაცი როდესაც მოდის, ეს არ არის ცოტა რაოდენობა. იქ 50 ათას კაცს არც ველოდით, რადგან ვიცით, რომ ასეთი ტიპის აქციებში ადამიანთა მხოლოდ ძალიან გაბედული ნაწილი მონაწილეობს და არა მთლიანად მასა. როცა პოლიციის სამმართველოსკენ გამოვაცხადეთ მსვლელობა, იქ ყველა თბილისელის მოსვლა წარმოუდგენელია. იქ მხოლოდ ავანგარდში ვინცაა, ის ადამიანები მოდიან.

ბევრი ხალხი იყო თუ ცოტა, საერთო განწობა საქართველოში არის ერთი - 6 მაისი არის გიორგობა და "ვანოობა" არასდროს იქნება, არც 23 ნოემბერი იქნება "მიშაობა".

_ ბატონო ზვიად, 6 მაისს თბილისის მერიასთან გამართულ აქციაზე გოგა ხანდრავას არაკორექტული გამოსვლით ოპოზიციას რეიტინგი რამდენად დაეცემა?

_ რა გითხრათ. ხაინდრავა რა განცხადებას გააკეთებს, ეს ჩემი განსასაზღვრი არ არის. ხაინდარავას თავისი შეხედულებები, ემოცია და თავისი ტემპერამენტი აქვს და იმის მიხედვით იქცევა. გასული წლის 9 აპრილის აქციებზედაც ვიღაცა რაღაცას იტყოდა და შემდეგ ამის ტრიალი მიდიოდა. როცა ემოციური აქციებია, ვიღაცა რაღაცას იტყვის, მაგრამ ეს არ ნიშნავს, რომ უნდა დავდგეთ მთელი ოპოზიცია და თავი ვიმართლოთ, ხაინდრავამ რომ რაღაც თქვა. შეიძლება ყველა ჩავარდეს ისეთ მდგომარეობაში, რომ ისეთი რამ თქვას, რასაც სხვა დროს არ იტყვის. ეს არაფერს ნიშნავს. დარწმუნებული ვარ, რომ თბილისელებმა ძალიან სწორად გაიგეს.

_ თუმცა იმავე საღამოს თქვენ ცეცხლსასროლი იარაღი გამოიყენეთ....

_ ჩემს სახლში ნებართვის გარეშე ცხვირს არავის შემოვაყოფინებ, იქნებიან ეს ნაციონალების მთვრალი თუ ნარკოტიკების ზემოქმედების ქვეშ მყოფი აქტივისტები და ჟურნალისტები. ჩემი სახლი ჩემი სამფლობელოა, ჩემი ინტიმია, ჩემი ოჯახია და იქ ცხვირის შეყოფის უფლება არავის აქვს! ამიტომ იქნება კიდევ თავდასხმა ჩემზე და ჩემს ოჯახში შემოსვლის მცდელობა _ იმავეს გავაკეთებ, რაც მაშინ გავაკეთე. იარაღის ტარების უფლება მაქვს და აქედან გამომდინარე, იმის უფლებაც, როდის გამოვიყენო იარაღი. მაშინ იარაღი სწორად გამოვიყენე და არსებული სიტუაცია დავამშვიდე, რომელიც ძალიან ცუდ და აგრესიულ კალაპოტში იყო გადასული.

რაც შეეხება ჟურნალისტების შემოსვლას, ღამის 02:30 საათზე გადმოხტნენ დაკეტილ ჭიშკარზე, ჩემს აივანზე ამოძვრნენ, ოთახებში კამერების ობიექტივები შემოყვეს და შემდეგ ნახევარ საათს კარზე ზარს რეკავდნენ. ხუთი მცირეწლოვანი ბავშვი გამიღვიძეს. მათ ამის უფლება არ ჰქონდათ. ჟურნალისტების მიმართ ყოველთვის ვცდილობ ვიყო კორექტული, მაგრამ ღამის სამის ნახევარზე სახლში შემოვარდნას არავის ვურჩევ.

_ ბოლო დროს ქართველი პოლიტიკოსები საქართველოს პატრიარქს იძულებულს ხდიან, პოლიტიკურ პროცესებში ჩაერთოს. ამის გათვალისწინებით, რამდენად მიზანშეწონილია მისი უწმინდესობის თქვენს წინასაარჩევნო კლიპში გამოყენება? გქონდათ პატრიარქისგან ამ კადრების გამოყენებაზე კურთხევა?

_ ჩემი მხრიდან პატრიარქის პოლიტიკურ პროცესებში ჩართვა არ ხდება. მინდა დაგამშვიდოთ ყველა და გითხრათ, რომ ეს მასალა საპატრიარქოდან მაქვს მოპოვებული. ეს არის იმ ეკლესიის კურთხევის კადრები, რომელიც ციხეში ავაშენე, რომელმაც "ციხე დაანგრია" და დღეს იქ წმინდა გიორგის სახელობის მამათა მონასტერია. ამიტომ ეს არ არის რაღაცა შემთხვევით აღებული კადრი და ჩემს საარჩევნო კლიპზე შემთხვევით დადებული.

რაც შეეხება იმას, თუ რატომ არის გამოყენებული პატრიარქის სახე ჩემს კლიპში, მისი უწმინდესობა ჩემი ორი შვილის ნათლიაა და თუკი მას არასწორად მიაჩნია, რასაც ვაკეთებ, ჩემთან ახლო ურთიერთობა აქვს და შეუძლია, ამის შესახებ პირადად მითხრას და ან ვინმემ მითხრას საპატრიარქოდან მინიშნებით და თუ ეს პრობლემაა, მოიხსნება, ამიტომ აქ ვერავითარ პრობლემას ვერ ვხედავ. პატრიარქმა ძალიან კარგად იცის ყველას თავის ადგილზე დაყენება.

იმ კლიპში ჩემთვის სამი უმთავრესი რამაა ჩადებული - ოჯახი, ჩემი პოლიტიკური საქმიანობა და და ეკლესიასთან და პატრიარქთან დამოკიდებულება. ამაში არავითარი სიყალბე არ არის. თქვენ შეგიძლიათ ამაში დარწმუნდეთ, თუ წამობრძანდებით ავჭალის ეკლესიაში, რომელიც პატიმრობის დროს საკუთარი ხელით ავაშენე. ანდა წამობრზანდით ჩემს მშობლიურ რაიონ სამტრედიაში, სადაც 20 წელია ეკლესიას ვაშენებ, რომელიც მომავალ წელს გავხსნება.

_ ბატონო ზვიად, თქვენს კლიპში ფრაზა - "შედეგი არიას უზარმაზარი" რას გულისხმობს? რა შედეგს მიაღწია ოპოზიციამ?

_ ოპოზიციამ კი არა, ხალხმა მიღწია. მათ დაინახეს, რომ რეალურად შეუძლიათ ერთად დადგნენ და ამ ქვეყანაში არსებული სიტუაცია შეცვალონ. დღესაც იგივე სიტუაცია გვაქვს, როდესაც ხალხმა უნდა მიიღოს გადაწყვეტილება. მართალია, იპოდრომის, 26 მაისის შემდეგ ვადამდელ არჩევნებს ვერ მივაღწიეთ, მაგრამ ეს იმას არ ნიშნავს, რომ ათჯერ როცა სჭირდება მოქნევა, ორჯერ მოიქნიო და გაჩერდე. უნდა იბრძოლო, სანამ არ გაიმარჯვებ. ხალხმა ეს ძალიან კარგად იცის. სახლში წამოწოლილი და "ვაი დედას" ძახილით არასდროს გაკეთებულა საქმე და არც მომავალში გაკეთდება.

_ "სააკაშვილს ბიშკეკი მოენატრება" - ბატონო ზვიად, ესეც თქვენი ფრაზაა. რას აპირებს "ეროვნული საბჭო", ბიშკეკის სცენარისთვის ხომ არ ემზადება?

_ კი, ვთქვი. მგონია, რომ რაც მოხდა ბიშკეკში, არის ძალიან ცუდი და იმის გამეორება, რაც ჩვენ უკვე ვნახეთ. საქმე ამისკენ არ უნდა წავიდეს. როცა ვამბობთ, რომ ჩვენს ხმებს დავიცავთ, საუბარია იმაზე, რომ ვაპირებთ პოლიტიკური მეთოდებით ბრძოლას. ბიშკეკში ხელისუფლება საერთოდ დაყრუვდა, ხალხის არ ესმოდა, თავიდან ბოლომდე კორუფციაში ჩაიძირა და ყველგან თავისი ნათესავები და კლანები დააწინაურა. ამის გამო ხალხსა და ხელისუფლებს შორის უფსკრული გაჩნდა, რამაც კონფრონტაცია გამოიწვია. საქართველოს ხელისუფლება ყირგიზეთის ხელისუფლებას ამ პარამეტრებითა და თვალსაზრისით ძალიან ჰგავს. თუმცა ხალხი სრულიად სხვაგვარია საქართველოში. მოსახლეობის ძირითადი ნაწილი დარწმუნებულია, რომ ხელისუფლება მშვიდობიანი გზით უნდა შეიცვალოს.

ამიტომაცაა, როცა ვერ მივდივართ იქ, სადაც მშვიდობა მთავრდება, ამას ჟურნალისტები და ხალხი შეცდომად გვითვლით. მერე როდესაც ვამბობთ, რომ სისხლის დაღვრა არ გვინდოდა - იძახით, რომ გამბედაობა არ გვეყო. როდესაც ვამბობთ, რომ შეიძლება უფრო რადიკალურ ზომებზე წავიდეთ - გვეუბნებით, "ბიშკეკიზაცია" გინდათო. მოკლედ, თქვენ თვითონაც უნდა ჩამოყალიბდეთ, რას მოითხოვთ ამ პოლიტიკოსებისგან. თუ გინდათ, რომ მშვიდობიანი, წესიერი, პოლიტიკური გზებით შეიცვალოს ხელისუფლება, ასეთ შემთხვევაში, გამწვავებისკენ არ უნდა მოგვიწოდებდეთ, მაგრამ როდესაც იპოდრომის აქციაზე ხალხი მშვიდობიანად დაიშალა, თვითონ თქვენ მიიჩნიეთ შეცდომად. ჟურნლისტების პოზიციიდან გამომდინარე, ოპოზიციას სთხოვთ, რომ "ნურც გაფრინდები, ნურც მოფრინდებიო".

_ ოპოზიცია თუ ჩამოაყალიბდა თვითონ _ რა უნდა?

_ მე არ ვიცი მთლიანად ოპოზიცია რას აპირებს, მაგრამ ერთი მინდა საზოგადოებას ვუთხრა, რომ აუცილებლად წავიდნენ არჩევნებზე. ერთადერთი გზა, რომლითაც ხელისუფლება უნდა შეიცვალოს, ეს არის არჩევნები. ამიტომ ნურავინ დაიზარებს ნახევარი კილომეტრის გავლას საარჩევნო უბანთან მისასვლელად. ასეთ შემთხვევაში სააკაშვილის არჩევნების გაყალბების გაცილებით ნაკლები შანსი აქვს და ჩვენ კი შანსი გვეძლევა, ხელისუფლება შევცვალოთ. საქართველოსთვის ხელისუფლების შეცვლის სხვა ფორმულა არ არსებობს.

_ ბატონო ზვიად, არსებობს მოსაზრება, რომ ექს-პრემიერ ზურაბ ნოღაიდელის "ოპოზიციური ფიგურა" ოპოზიციისთვის სახელის გასატეხად შეიქმნა და რომ არა მასთან თანამშრომლობა, ზვიად ძიძიგურს დღეს უფრო მაღლი რეიტინგი ექნებოდა...

_ ნოღაიდელთან ჩვენი ურთიერთობა გამოწვეულია ჩვენი საერთო ხედვებიდან გამომდინარე. ეს საერთო ხედვაა რუსეთთნ ურთიერთობის დარეგულირება. ნოღაიდელმა გაჭრა ეს არხი და თემა, რომელიც ამ ხნის განმავლობაში ტაბუდადებული იყო. დღეს კი საყოველთაო განხილვის საგანი გახდა. რუსეთთან ურთიერთობები რომ უნდა გადაიხედოს, ამაზე უკვე ღიად მიდის საუბარი და ეს ნოღაიდელის დამსახურებაა, რაშიც მცირე წვლილი ჩვენი ჩართულობით ჩვენც შევიტანეთ. ჩავერთეთ ამ პროცესში, მიუხედავად იმისა, რომ ყველა მოღალატედ ცხადდებოდა, ვინც კი რუსეთთან ურთიერთობების დარეგულირებაზე ხმას ამოიღებდა. ამის მიუხედავად, ეს შევძელით და რადგან საქართველოს სხვაგვარად პერსპექტივა არ გააჩნია.

_ 9 მაისს მოსკოვში გამართულ საზეიმო აღლუმს ზურაბ ნოღაიდელი ვერ დაესწრო. იგი საპატიო სტუმრის სტატუსით არ იყო მიპატიჟებული. თუმცა, რუსეთის პრემიერ-მინისტრის ვლადიმერ პუტინის გვერდზე პარლამენტის ყოფილი თავმჯდომარე ნინო ბურჯანაძე ვიხილეთ. როგორ ფიქრობთ, კრემლმა არჩევანი ბურჯანაძეზე ხომ არ გააკეთა და ნოღაიდელი თამაშგარე დატოვა?

_ კრემლმა ვისზე გააკეთა არჩევანი, ეს ნაკლებად მაინტერესებს. მე მინდა, რომ საქართველომ თავისი არჩევანი რუსეთთან ურთიერთობის დარეგულირებაზე გააკეთოს. ნოღაიდელი არ იყო საპატიო სტუმრად მიწვეული. საპატიო სტუმრად რომ ყოფილიყო მიწვეული, მაშინ იტყოდნენ სისხლისმსმელ პუტინთან საპატიო სტუმარი იყო და ეს უხერხულობას როგორ არ უქმნიდაო. ისევე როგორც კობა დავითაშვილისა და ჟირინოვსკის ხელის ჩამორთმევის ამბავი რომ გახდა განხილვის მთავარი თემა. ხშირად ეს ყველაფერი აბსურდამდე მიდის. რა შუაშია, ვინ რა სტატუსით იყო, ვინ რომელ კუთხეში იჯდა და პუტინმა ლაპარაკისას რომელი წარბი აწია. ამას არავითარი მნიშვნელობა არ აქვს.

რუსეთის დღევანდელი ხელისუფლება დაახლოებით კიდევ 20 წელს იქნება, მაშინ გადავდოთ ეს საკითხი 20 წლით. თუ ასე გაგრძელდა, 20 წლის შემდეგ საქართველო შეიძლება საერთოდ არ იყოს. ამიტომ საქართველოს ხელისუფლებამ კეთილი უნდა ინებოს და რუსეთის ხელისუფლებას დაელაპარაკოს, სანამ ჯერ კიდევ ხელისუფლებაშია. თუ ამას ვერ ახერხებს, არა უშავს, ის წავა და დალაპარაკებას სხვა მოახერხებს. სხვანაირად საქართველოს არანაირი პერსპექტივა არ აქვს და ეს 9 მაისმაც გვაჩვენა, როდესაც წითელ მოედანზე პოლონეთის, ინგლისის, საფრანგეთის, აშშ-ის საჯარისო ნაწილებმა ჩამოიარა. ამან თუ გითხრათ რამე... რა უნდა გავაკეთოთ, გაბუტულ მდგომარეობაში ვიყოთ და არ შევიმჩნიოთ რუსეთი? არადა, რომ არსებობს, სამხრეთ კავკასიაში სერიოზული რომ ინტერესები აქვს და ამ ინტერესების გამო ჩვენ ყოველთვიურად ცხვირში გვხვდება... ამას როგორ უნდა გაუკეთო იგნორირება, როდესაც სახელმწიფოს ხელმძღვანელი, პოლიტიკოსი და თუნდაც ჟურნალისტი ხარ.

_ როგორ გესახებათ რუსეთთან ურთიერთობის აღდგენის შემდეგ ქვეყნის ოკუპირებული ტერიტორიების დაბრუნება?

_ ტერიტორიული მთლიანობის აღდგენა ძალიან იოლად მესახება. უნდა დაველაპარაკოთ პირდაპირ აფხაზებსა და ოსებს. სტატუსის საკითხები უნდა გადავდოთ. უნდა ვისაუბროთ საერთო ეკონომიკურ, კულტურულ და სოციალურ პროექტებზე. საერთო გეოგრაფიულ პრობლემებზე, საერთო ტერიტორიულ ჭრილში კავკასიურ პრობლემებზე და ამ მიმართულებით უნდა დავიწყოთ ჯერ მათთან მუშაობა.

აგვისტოს ამბების შემდეგ გართულდა ყველაფერი, მაგრამ აფხაზეთის გავლით რუსეთისკენ რკინიგზა რომ გაიხსნა, ნახავთ, რომ ყველა რეგიონს შორის ურთიერთობა დარბილდება. ჩვენი ყოფილი ავტონომიები, რომლებიც დღეს უკვე დამოუკიდებლობისკენ სწრაფვას ადასტურებენ, საქართველოს ცენტრალურ ხელისუფლებას დაელაპარაკებიან.

როცა ერგნეთის ბაზრობა მუშაობდა, მაშინ პოლიტიკური ვითარება ყოფილი სამხრეთ ოსეთის ტერიტორიაზე ძალიან დარბილებული იყო. ოსები და ქართველები ქორწილებში ერთად დადიოდნენ, ერთი პრობლემები ჰქონდათ, ონი-ცხინვალისა და ცხინვალი-თბილისის რეისით ავტობუსი დადიოდა. ეს ყველაფერი კი იმიტომ იყო, რომ გაკეთდა ბაზრობა, სადაც ფული იშოვებოდა და ეს ყველა ხელს აძლევდა, როგორც რუსს, ასევე ოს და ქართველს. აფხაზეთში ასეთი პროექტები უნდა განხორციელდეს, სხვაგვარად წარმოუდგენელია. სხვა გზა არ არსებობს, მაშინ უნდა ვიყოთ ასე კონფრონტაციის რეჟიმში, ავტომატმიშვერილები ერთმანეთზე და თანაც ვიცით, რომ სანამ რუსეთი მათ უკან დგას, ვერაფერს დავაკლებთ.

_ თუმცა რუსეთმა საქართველო ურთიერთობის ე. წ. დათბობის დროს არაერთხელ მოატყუა...

_ კი. მერე რა. აბა, რა გგონიათ... ამერიკამ რამდენჯერ მოატყუა საქართველო ან ევროპულმა სახელმწიფოებმა? თუ თავს მოატყუებინებ, ყველა მოგატყუებს, იმიტომ რომ ყველას თავის ინტერესი აქვს. ჩვენ ჩვენი ინტერესები უნდა დავიცვათ. რას ჰქვია მოატყუა?! მოატყუებდა, აბა რას იზამდა. ამიტომ მუდმივად შენი სამშობლოს სადარაჯოზე უნდა იდგე. ხელისუფლების ფუნქცია სხვა რა არის? მაგრამ დღევანდელი ჩვენი ხელისუფლების ფუნქცია არის ის, რომ თვე-ნახევრით გაიქცეს კოსტა-რიკაში და და ზემოთ-ქვემოთ ირბინოს, მერე ჩამოვიდეს, გახსნას რაღაც და ისევ გაიქცეს.

_ რუსეთისთვის ნატო სახელმწიფო საფრთხედ გამოცხადდა. ამის გათვალისწინებით, როგორ ფიქრობთ, ხომ არ მოგვიწევს კრემლთან მოლაპარაკების სანაცვლოდ აღნიშნული საკითხის გადახედვა?

_ ეს პრობლემა რუსეთისთვის უკვე აღარ არსებობს, რადგან საქართველოს ნატოსკენ სწრაფვა ცალსახად მაშინ გადაწყდა, როცა ნატოს ქვეყნების ჯარებმა წითელ მოედანზე აღლუმში მიიღეს მონაწილეობა. ვინ გიღებს იმ ნატოში?! ბუქარესტის სამიტიდან სააკაშვილმა ფორმულირება რომ ჩამოიტანა - საქართველო ნატოს წევრი აუცილებლად გახდებაო. მისასალმებელია, მაგრამ როდის? პოლიტიკაში ეს არის მთავარი კითხვა.

ნატოში შეიძლება საქართველოზე ადრე რუსეთი შევიდეს. რუსეთს რომ ვუთხრათ, ნატოში არ შევალთ და ტერიტორიების დაბრუნებაში დამეხმარეო, სიცილით მოკვდება. ვინ გიღებს რომ ამ ნატოში?! ამოგვარტყეს პანღური და არ მიგვიღეს. ახლა ვიძახოთ: ნატო, ნატო... ეს თემა ზღაპარია სულელებისთვის და ბრიყვებისთვის, არავითარი ნატოს პერსპექტივა საქართველოს არ აქვს. რეალობას ჩავხედოთ თვალებში და არ გვინდა ერთმანეთის "დაბოლება".

_ დაბოლოს, გეგმავს თუ არა "ეროვნული საბჭო" "წარმომადგენლობით სახალხო კრებასთან" თანამშრომლობას?

_ აუცილებლად ვითანამშრომლებთ. ეს ძალიან კარგი და სწორი იდეაა. ასეთი იდეა გასული წლის 26 მაისსაც არსებობდა. სამწუხაროდ, ეს პროექტი მაშინ ჩავარდა. ამის მიუხედავად, ეს არის იდეა, რომელსაც განხორციელება სჭირდება. რა თქმა უნდა, ეს არის ახალი სიტყვა ქართულ პოლიტიკაში. ამას ბევრი მუშაობა უნდა, რომ ჩამოყალიბდეს კონკრეტულად, რა ფუნქციები ექნება წარმომადგენლობით კრებას.


"ჯი-ეიჩ-ენი", ესაუბრა თამარ მამუკაშვილი 

ავტორი: . .