დღეს არჩილ ხაბაძე ხუცუბნის წყალსადენის პროექტის შედეგებს გაეცნო. ხუცუბანში წყალსადენი სისტემის რეაბილიტაცია მიმდინრემ პროცესშია.  პროექტის განსახორციელებლად ჯამში 2 284 000 ლარი დაიხარჯება.

ხუცუბანში წყალსადენი სისტემის რეაბილიტაცია მრავალწლიანი პროექტია. გასულ წელს პროექტის პირველი ეტაპი განხორციელდა. ინფრასტრუქტურული  ღონისძიების  ფარგლებში სათავე ნაგებობები და ცენტრალური მაგისტრალი მოეწყო, ასევე რეაბილიტაცია ჩაუტარდა არსებულ რეზერვუარებს. განხორციელებული სამუშაოების შედეგად გაიზარდა წყლის დებეტი და ამ ეტაპისთვის 24 საათიანი წყალმომარაგებით 800-ზე  მეტი ოჯახი არის უზრუნველყოფილი. სასმელ-სამეურნეო წყალი შეუზღუდავად მიეწოდება ისეთ ოჯახებს, სადაც წყალმომარაგება არასდროს არსებობდა.

ხუცუბნის წყალსადენი სისტემის სარეაბილიტაციო სამუშაოები წელსაც გრძელდება. მალე  პროექტის მეორე ეტაპის განხორციელება დაიწყება, რომელიც  შიდა მაგისტრალური ქსელის მოწყობასა და აბონენტთა გამრიცხველიანობას ითვალისწინებს. პროექტის განხორციელებისთვის 1 124 000 ლარია გამოყოფილი.

ხუცუბნის წყალსადენი სისტემის სრული რეაბილიტაცია ნოემბრის თვეში დასრულდება. დღეს აჭარის მთავრობის თავმჯდომარე ქობულეთის მუნიციპალიტეტის წარმომადგენლებთან ერთად ადგილზე გაეცნო პროექტის შედეგებს და სოფელ ხუცუბანში მცხოვრებ ერთ-ერთ ოჯახს ესტუმრა. ოჯახის წევრების განმარტებით, „25 წლიანი შუალედის შემდეგ, სოფელში პირველად მოხდა სასმელი წყლის  უწყვეტი რეჟიმით მიწოდება“.