დისკრიმინაციის აკრძალვის ევროპული სტანდარტების თემაზე პროკურორებისათვის ტრენერთა ტრენინგის პირველი ეტაპი დასრულდა. პროექტი საქართველოს პროკურატურისა და ევროსაბჭოს თანამშრომლობის ფარგლებში, ევროპის საბჭოსა და ევროკავშირის საერთო პროექტის ,,საქართველოს ადამიანის უფლებათა ევროპული კონვენციის გამოყენება და ეროვნული კანონდებლობისა და სასამართლო პრაქტიკის შესაბამისობაში მოყვანა ევროპულ სტანდარტებთან“ მხარდაჭერით ხორციელდება.
პროკურატურის ინფირმაციით, ტრენინგის ფარგლებში მოწვეულმა საერთაშორისო და ადგილობრივმა ექსპერტებმა, პროკურორებს გააცნეს: დისკრიმინაციასთან დაკავშირებული ეროვნული სამართლებრივი და საერთაშორისო ნორმები, დისკრიმინაციული ფაქტების გამოძიების ტაქტიკა და მტკიცებულებათა მოპოვება. ტრენინგზე სამართლებრივ ნორმებთან ერთად, ევროსასამართლოს პრეცედენტული სამართალიც მიმოიხილეს. სასწავლო პროცესი დატვირთული იყო პრაქტიკული სავარჯიშოებით.
ტრენინგის მიზანია დისკრიმინაციის ყველა ფორმით აკრძალვის შესახებ პროკურატურის სისტემის თანამშრომელთა კვალიფიკაციის ამაღლება ადამიანის უფლებათა ევროპული კონვენციის მიხედვით.
ტრენერთა გუნდის მომზადებასთან ერთად, დაგეგმილია შესაბამისი სასწავლო პროგრამისა და მასალების შემუშავება, რომლის ფარგლებშიც სამომავლოდ პროკურორები და პროკურატურის სისტემის გამომძიებლები გადამზადდებიან.
პროექტის ფარგლებში შემდეგი სასწავლო აქტივობა 2016 წლის თებერვალში განხორციელდება.
