ლაშა მახარაძის მკვლელობაში ბრალდებული გიორგი ოქროპირიძე თავს უდანაშაულოდ მიიჩნევს და მისი საქმის ობიექტურად გაშუქებისთვის მადლობას უხდის „პირველ არხს“ და „რუსთავი 2“-ს.
,,რაც შეეხება, „იმედმა“ მან რაც გააკეთა იყო წაქცეულ ხალხზე წიხლის დაჭერა. მიიყვანეს ვიღაც ჟვანია. დასვეს ეთერში, რომელმაც რაღაც საშინელებები ილაპარაკა. არც ვიცნობ ამ ადამიანს. დარბაზში ახლა ვხედავ მათ, ვისთვისაც შანტაჟი, ადამიანისთვის ჩირქის მოცხება არაფერია. გამოდიან მრგვალ ბაღში. რაღაც შეკრებებს აწყობენ. არაფერი ცხოვრებაში არ დამიშავებია. მაგ ჟვანიას წონა მედლები მაქვს. ეს ხალხი შეურაცხყოფას აყენებს მსაჯულებს. ვერდიქტის გამოტანის დღეს ნაფიცებზე განხორციელდა ზეწოლა, მუქარა, მათ შორის სასულიერო პირების მხრიდან, რომლებიც დარბაზში იმყოფებოდნენ“, - განაცხადა დღევანდელ სხდომაზე ოქროპირიძემ.
მისი თქმით, სხდომის დახურვა მიზანშეწონილია მისი ოჯახის უსაფრთხოებისთვის, ვინაიდან ორქოპირიძის განცხადებით, მის ოჯახს ხშირად დაუზიანეს ავტომანქანა. ცოტა ხნის წინ კი, როგორც ბრალდებულმა აღნიშნა, მამამისის მანქანა დაწვეს.
ბრალდების მხარე აღნიშნულ შუამდგომლობას არ დაეთანხმა.
გიორგი ოქროპირიძის ადვოკატები საქმეზე სახალხო დამცველის უჩა ნანუაშვილისა და აჭარის უმაღლესი საბჭოს დეპუტატის მედეა ვასაძის დაკითხვასაც ითხოვენ. შუამდგომლობა პროცესზე დაცვის მხარემ დააყენა. მათ მტკიცებულებათა ნუსხაში ერთი ტომის დამატება მოითხოვეს.
როგორც ადვოკატები აღნიშნავენ, უჩა ნანუაშვილს რამდენიმე მოსაზრება აქვს წარმოდგენილი ოქროპირიძის საქმეში.
დაცვის მხარე კი ითხოვს, საქმეს დაერთოს ტელეკომპანია „რუსთავი 2“-ისა და „პირველი არხის“ სიუჟეტები.
ადვოკატების მტკიცებით, „პირველი არხის“ სიუჟეტში ჩანს, რომ სათვალთვალო კამერები, სადაც შემთხვევის ადგილი მოხვდა, არსებობს და შესაძლებელი იყო ამ სათვალთვალო კამერით დაფიქსირებულიყო შემთხვევა.
ასევე, ადვოკატის თქმით, სიუჟეტში წარმოდგენილი ერთ-ერთი ქალბატონი დაადასტურებს იმას, რომ ლაშა მახარაძესა და გიორგი ოქროპირიძეს შორის კონფლიქტი არ ყოფილა.
აღნიშნულ შუამდგომლობაზე პასუხს მოსამართლე ეკა არეშიძე ხვალ იტყვის.
სხდომა ხვალ 11:00 საათზე ჩაინიშნა.
