იუსტიციის მინისტრი თეა წულუკიანი აგვისტოს ომში დაზარალებულებს მოუწოდებს, 30 დღის ვადაში, ჰააგის სასამართლოს მსხვერპლთა დაცვის სამსახურს მიმართონ და მოითხოვონ, რომ მომავალში იყვნენ დაკითხული იმ მისიების მიერ, რომლებიც დაიწყებენ ჩამოსვლას მსხვერპლთან შესახვედრად.
მინისტრის თქმით, ისინი იზრუნებენ, რომ დაზარალებულები და მოწმეები დაცულნი იყვნენ.
„არის შემთხვევები, როდესაც ჰააგის პროკურატურას დაუწყია გამოძიება და შემდეგ მოწმეებს გადაუთქვამთ ჩვენება ან დაზარალებულებს გადაუთქვამთ საკუთარი ჩვენებები. ჩვენ ვიზრუნებთ, რომ დავიცვათ, ერთობლივი ძალებით, დაზარალებულები და მოწმეები” - განაცხადა მინისტრმა.
მისი ინფორმაციით, კონტაქტები დღეიდან იუისტიციის სამინისტროს ვებგვერდზე აიტვირთება.
,,შეგიძლიათ, მიმართოთ, როგორც უშუალოდ, ასევე ადვოკატის მეშვეობით და გაქვთ 30 დღიანი ვადა, რომ მხარი დაუჭიროთ პროკურორის შუამდგომლობას ეთნიკური წმენდის გამოძიებასთან დაკავშირებით და მოითხოვოთ, რომ მომავალი კვირიდან იქნეთ დაკითხული იმ მისიების მიერ, რომლებიც დაიწყებენ ჩამოსვლას მსხვერპლთან შესახვედრად“, - განმარტა თეა წულუკიანმა.
ჰააგის სისხლის სამართლის საერთაშორისო სასამართლოს პროკურორი ფატუ ბენსუდა იუსტიციის მინისტრს, მთავარ პროკურორსა და მის მოადგილეებს შეხვდა.
