სააპელაციო სასამართლოში მერაბ ყოლბაიას, იგივე კოჭოიას საქმეზე დაკავებული დავით კეკუტიას საქმის განხილვა დაიწყო. 7 თვიანი მოლოდინის შემდეგ პროცესი ისევ პროკურატურის მიზეზით გადაიდო. სასამართლო საქმეს ახალი გარემოებების საფუძველზე განიხილავს. საკონსტიტუციო სასამართლომ 2015 წლის 22-ი იანვარს ირიბი მოწმის ჩვენებაზე დაყრდნობით განაჩენის გამოტანა აკრძალა. ამ საქმეში კი ადვოკატის მტკიცებით, მხოლოდ ირიბი მოწმე ფიგურირებს. მოგვიანებით მოწმე მერაბ ყოლბაიამ, იგივე კოჭოიამ სასამართლო პროცესზე აღიარა, რომ დავით კეკუტიას საერთოდ არ იცნობს და მისი სახელი ზეწოლის შედეგად დაასახელა. დავით კეკუტია ტერაქტში მონაწილეობის ბრალდებით 2011 წლის თებერვალში დააკავეს. მას 30 წელი მიესაჯა, თუმცა ამნისტიისა და სხვადასხვა საკანონმდებლო ცვლილებების შედეგად სასჯელი შეუმცირდა. კეკუტია 5 წელია, პატიმრობაში იმყოფება.
