ფოთის იუსტიციის სახლის შენობა, გახსნამდე იუსტიციის მინისტრმა თეა წულუკიანმა ფოთის მაჟორიტარ დეპუტატთან ეკა ბესელიასთან და ფოთის მერთან ირაკლი კაკულიასთან ერთად დაათვალიერა.
სამინისტროს ცნობით, შენობა გასახსნელად და მომხმარებელთა მისაღებად სრულ მზადყოფნაშია, დასრულებულია მომსახურების სივრცეების მოწყობა. ასევე გამართული და მოწყობილია სერვისების განვითრების სააგენტოს, საჯარო რეესტრის ეროვნული სააგენტოს, აღსრულების ეროვნული ბიუროსა და დანაშაულის პრევენციის ცენტრის ოფისები, რომლებიც იუსტიციის სახლის შენობაში განთავსდებიან.
შენობის დათვალიერების შემდეგ მინისტრმა ქორწინების სახლის სარიტუალო დარბაზიც დაათვალიერა, რომელიც სერვისების განვითრების სააგენტოს ეკუთვნის და იუსტიციის სახლის ცალკე ფლიგელშია განთავსებული. ბოლოს მინისტრი გახსნის ღონისძიების მოსამზადებელ სამუშაოებსაც გაეცნო, რომელიც ხვალ 20:00 საათიდან დაიწყება.
იუსტიციის სახლის მეთოთხმეტე ფილიალის საზეიმოდ გახსნასთან დაკავშირებით ხვალ, 27 ივლისს, 20:00 საათიდან ფოთში, გრანდიოზული სანახაობა და კონცერტი გაიმართება. იუსტიციის სახლს საპორტო ქალაქში საქართველოს იუსტიციის მინისტრი თეა წულუკიანი გახსნის.
ოფიციალური ნაწილის დასრულებისთანავე დაიწყება შოუ. მოსახლეობას საშუალება ექნება, ნახოს ფერადი კვამლის ფოიერვერკი, რომელიც საქართველოში პირველად სწორედ იუსტიციის სახლის გახსნაზე იქნება გამოყენებული. სპეციალურად ფოთის იუსტიციის სახლის გახსნისთვის მომზადდა კოსტუმირებული მუსიკალური შოუ, დრამერების კოსტუმირებული სანახაობა და სხვა მრავალი საინტერესო ელემენტი. საზეიმო გახსნა ჯგუფი „მგზავრების“ კონცერტით დაიხურება, რომელსაც გრანდიოზული ფოიერვერკი დაასრულებს.
ფოთის იუსტიციის სახლის საზეიმო გახსნას მთავრობის, დიპლომატთა კორპუსის, პარლამენტისა და ბიზნესსექტორის წარმომადგენლები დაესწრებიან. თუმცა, საზეიმო გახსნაზე იუსტიციის სახლი ელის ყველას, ვისაც სურვილი აქვს, ნახოს ულამაზესი შოუ, კონცერტი და აღნიშნოს საპორტო ქალაქში იუსტიციის სახლის გახსნა.
ფოთის იუსტიციის სახლის კონცეფციაც, სხვა ფილიალების მსგავსად, სწრაფი და ეფექტური მომსახურების მიწოდებას წარმოადგენს. ფოთის მოსახლეობას უკვე 27 ივლისიდან ექნება საშუალება, 400-მდე სერვისი მომსახურების უმაღლესი სტანდარტით უმოკლეს დროში მიიღოს.
