უნგრეთში „დუნაის დღისადმი“ მიძღვნილ ღონისძიებაზე პატივი მიაგეს 2015 წლის 13 ივნისს თბილისის წყალდიდობის დროს დაღუპული ადამიანების ხსოვნას.
საგარეო უწყების ცნობით, ღონისძიებას ორგანიზება გაუწია ადგილობრივმა არასამთავრობო ორგანიზაცია „ძველი უნგრული კულტურის მეგობრების გაერთიანებამ“. ღონისძიებაზე სიტყვით გამოსვლისას გაერთიანების გენერალურმა მდივანმა, ლასლო ბოტამ, 13 ივნისს თბილისში დატრიალებულ ტრაგედიაზე ისაუბრა. ლასლო ბოტამ ასევე საქართველოსა და მის უძველეს კულტურაზე ისაუბრა.
საქართველოს საელჩოს სახელით მდინარეში გვირგვინის ჩაშვების ცერემონიალი გაიმართა და დამსწრე საზოგადოებამ წუთიერი დუმილით საქართველოს დედაქალაქში დაღუპულთა ხსოვნას პატივი მიაგო.
ღონისძიებაში საქართველოს საელჩოს წარმომადგენელმა მიიღო მონაწილეობა.
აღნიშნული ღონისძიებისას, რომელიც ყოველწლიურად იმართება, პატივს მიაგებენ წყალში და წყალდიდობების დროს დაღუპული ადამიანების ხსოვნას.