დელფინებისა და ვეშაპთა მსოფლიო დღეს ბათუმის დელფინარიუმი მორიგი მატებით შეხვდა. „6 მაისის პარკის“ ფეხფარფლიანთა განყოფილებაში ეს უკვე რიგით მეხუთე მატებაა. სამხრეთ ამერიკული ზღვის ლომების ოჯახში 22 ივლისს, 23:30, პატარა კონის შეეძინა, ხოლო 19 ივლისს, გამთენიისას, დედა მარი გახდა. მამა ორივე შემთხვევაში, საზოგადოებისთვის კარგად ცნობილი, პედროა. პატარები თავს კარგად გრძნობენ. ორივე სრულიად ჯანმრთელია. იკვებებიან დედის რძით. დაიბადნენ მუქი ყავისფერი ბეწვით. ახალდაბადებულთა სავარაუდო წონა 11-15 კგ-ია. მართალია, ზღვის ძუძუმწოვართა ცენტრში, ეს ნამატის პირველი შემთხვევა არაა, მაგრამ ნებისმიერ მატებას სიხარულის ისეთი შეგრძნება თან სდევს, თითქოს ეს პირველია. ეს წარმატება, იმის ნათელი დადასტურებაა, რომ ბინადრები, მოვლისა და შენახვის თვალსაზრისით იდეალურ გარემოში იმყოფებიან, ყველა პრევენციული ზომების გათვალისწინებით კვალიფიციური სპეციალისტების მეთვალყურეობის ქვეშ. დელფინარიუმის მესვეურნი ყურადღებასა და ალერსს არ აკლებენ ახალ ბინადარებს. სამხრეთ ამერიკის ზღვის ლომები ფართოდ არიან გავრცელებული, პერუს ჩრდილოეთიდან სამხრეთ ბრაზილიამდე, ფოლკლენდის კუნძულების ჩათვლით. ბინადრობენ ატლანტიკის და წყნარი ოკეანის სანაპიროებზე. ცხოვრობენ ნაპირთან ახლოს, იშვიათად გვხდებიან ღრმა წყლებში. იკვებებიან თევზებით და ზღვის სხვა ორგანიზმებით, საკვების რაოდენობა შეესაბამება სხეულის წონის 5-8%-ს დღეში (6.8-18.2კგ). დაწყვილების დრო აგვისტოდან დეკემბრამდე პერიოდს მოიცავს. ერთი მამრი 18-მდე მდედრთან წყვილდება, ფეხმძიმობა 11-11,5 თვეს გრძელდება. სამხრეთ ამერიკის ზღვის ლომებს ახასიათებთ მკვეთრად გამოხატული სქესობრივი დიმორფიზმი. როგორც წესი წონით მამრი ორჯერ აღემატება მდედრს. ბეწვის შეფერილობა მოყავისფრო-ოქროსფერია. ზრდასრულ მამრს გააჩნია ფაფარი, რომელიც შედარებით ღია ფერისაა ვიდრე ბეწვი. სამხრეთ ამერიკის ზღვის ლომების ზომები ძლიერ ვარირებს. მამრის ზომა 2.73 მ-ზე მეტია, ხოლო წონა 350 კგ აღწევს. მდედრის ზომა 1.8-2 მ-ა, წონა კი მამრების წონის ნახევარია, დაახლოებით 150კგ. შეტანილია ბუნების დაცვის მსოფლიო კავშირის „წითელ ნუსხაში“(IUCN), მინიჭებული აქვს LR (დაბალი რისკი) კატეგორია. გახსნის დღიდან ანუ ბოლო 4 წლის მანძლზე ბათუმის დელფინარიუმში 5 ზღვის ლომი დაიბადა, მათი საბინადრო ტერიტორია მოიცავს საცურაო და საკარანტინო აუზებს, ხელოვნურ გამოქვაბულს. სამეცნიერო კლასიფიკაცია: სამეფო: ცხოველები ტიპი: ქორდიანები კლასი: ძუძუმწოვრები რიგი: მტაცებლები ოჯახი: ყურებიანი სელაპები გვარი: ფარფლფეხიანები სახეობა: ზღვის ლომი