რესპოდენტის შესახებ
_ საქართველოში ყოველი არჩევნების წინ ბევრი პოლიტიკური პარტია იქმნება. ჩვენს ქვეყანაში 200-ზე მეტი პოლიტიკური გაერთიანებაა რეგისტრირებული, რომლებმაც სხვადასხვა დროს არჩევნებში მიიღეს მონაწილეობა. მათი უმრავლესობა კი მაისის არჩევნებში აღარ მონაწილეობს. როგორ იქნება თქვენ შემთხვევაში? "სახალხო დემოკრატები" ერთჯერადად, მხოლოდ მოახლოებული არჩევნებისთვის შექმნილი ძალაა თუ უფრო შორსმიმავალი გეგმები გაქვთ?
_ მთლიანად ქართულ საზოგადოებას მინდა განვუცხადო, რომ "სახალხო დემოკრატები" არ შექმნილა მხოლოდ 30 მაისისთვის. ჩვენ გვაქვს უფრო შორსმიმავალი გეგმები. ვაპირებთ მონაწილეობა მივიღოთ საპარლამენტო არჩევნებშიც და ვაპირებთ, ქართულ პოლიტიკაში მთლიანად ჩავერთოთ.
_ შორსმიმავალ გეგმებში ქვეყნის საპრეზიდენტო არჩევნებში მონაწილეობასაც ხომ არ გულისხმობთ?
_ არ გამოვრიცხავ. ნებისმიერ პოლიტიკურ ძალას უნდა ქვეყნის ხელისუფლებაში მოსვლა. შესაძლოა, მე არა, მაგრამ ვინმე, "სახალხო დემოკრატების" მიერ წარდგენილი კანდიდატი გახდეს საქართველოს პრეზიდენტი. რა თქმა უნდა, ჩვენს პოლიტიკურ პარტიას აქვს ხელისუფლებაში მოსვლის ამბიცია. სხვანაირად პოლიტიკაში ყოფნა წარმოუდგენელია.
_ საყოველთაოდ გავრცელებული აზრია, რომ როდესაც პოლიტიკურ ძალას საკუთარი მიღწევებისა და მომავალი გეგმების გაპიარება არ შეუძლია წინასაარჩევნო კამპანიას მოქმედი ხელისუფლების კრიტიკაში ატარებს. ერთი შეხედვით, ნიკა ივანიშვილმა ხელისუფლების კრიტიკის გზა აირჩია. რამდენად მოგიტანთ ეს გზა არჩევნებში წარმატებას?
_ არ ვიცი, რამდენად მოგვიტანს ეს გზა გამარჯვებას. ეს 30 მაისს გამოჩნდება და ამას ამომრჩეველი გადაწყვეტს, თუმცა ჩვენ პოლიტიკაში ჩავერთეთ იმის გამო, რომ ხელისუფლების მთელი რიგი ნაბიჯები არ მოგვწონდა. ახლა ხელისუფლების გაკრიტიკება უკვე ღიად, როგორც პოლიტიკური პარტიის თავმჯდომარეს, ისე შემიძლია. ის მცდარი ნაბიჯები, რომლებიც ხელისუფლებამ გადადგა, რომ არ გავაკრიტიკო, არ შემიძლია. მეორე საკითხია, რასაც მოსახლეობას მათთან შეხვედრების დროს ვპირდებით, თუ რას გავაკეთებთ გამარჯვების შემთხვევაში. შენი გადაგმული ნაბიჯებით მოსახლეობას უნდა დაანახო, რისი გაკეთება შეგიძლია. პოლიტიკა ზუსტად ეს არის: ვიღაცა გაგაკრიტიკებს, ვიღაცას შენ გააკრიტიკებ. ასევე უნდა შეგეძლოს თავის დაცვა და ოპონენტს კრიტიკის საფუძველი არ უნდა მისცე.
_ ნიკა ივანიშვილი ოპოზიციის ნაწილსაც აკრიტიკებს, მათ შორის განსაკუთრებით "ქრისტიან-დემოკრატების" თბილისის მერობის კანდიდატ გია ჭანტურიას. თქვენ მას მოსახლეობის მოტყუებაშიც დასდეთ ბრალი. რაში ატყუებს ჭანტურია თბილისის მოსახლეობას?
_ ჭანტურიაზე რაც ვთქვი, სხვანაირად გაიგო ჟურნალისტმა, ვინც ეს მკითხა. მე ვთქვი, რომ გია ჭანტურიას, როგორც თბილისის მერობის კანდიდატს (და რომც გახდეს იგი მერი), არანაირი საშუალება და ბერკეტი არ ექნება იმისთვის, რომ ტარიფებს, რომელსაც იგი ამომრჩეველს ჰპირდება, ხორცი შეასხას. ეს ქვეყნის ცენტრალური ხელისუფლების გადასაწყვეტი საკითხია. ამიტომ ეს მივიჩნიე ცრუ დაპირებებად. თუ ოპოზიციის კრიტიკაზე ვისაუბრებთ, მინდა განვაცხადო, რომ გარკვეული იმედგაცრუება და უკმაყოფილება ოპოზიციის მიმართ მქონდა, განსაკუთრებით აგვისტოს მოვლენებისა და გაზაფხულის საპროტესტო აქციების შემდეგ. ეს იყო ერთ-ერთი მიზეზი, რის გამოც დღის წესრიგში დავაყენე პოლიტიკური პარტიის შექმნის საკითხი.
_ წინასაარჩევნოდ თქვენ გია ჭანტურიასთან დებატებიც გსურდათ...
_ ერთ-ერთ ტელევიზიაში გია ჭანტურიასთან დებატებში მიმიწვიეს, თუმცა იგი არ მოვიდა. მიმაჩნია, რომ წინასაარჩევნოდ დებატები ამომრჩევლისთვის ძალიან საინტერესოა. ამომრჩეველმა სწორი ანალიზი უნდა გააკეთოს, თუ ვის დაუჭიროს არჩევნებში მხარი.
_ კიდევ ვისთან ისურვებდით წინასაარჩევნო დებატებს?
_ მე პირადად დებატებს ყველა კანდიდატთან ვისურვებდი, განსაკუთრებით კი გიგი უგულავასთან, თუმცა მას ახლა არ სცალია, ხან პურს აცხობს, ხან ყასბებთან მუშაობს და ხანაც მინებს წმენდს.
_ რეალურად თქვენმა პარტიამ მხოლოდ "მწვანეებთან" შეძლო პოლიტიკური შეთანხმების გაფორმება. თქვენ არ დაგიძახეს არც ჭადრაკის სასახლეში გამართულ ოპოზიციის შეხვედრაზე და არც "ლეიბორისტების" მიერ ინიცირებულ "თბილისი-მარიოტში" გამართულ შეხვედრაზე. ამასთან, არც ერთი კანდიდატი თავის უმთავრეს კონკურენტად არ გასახელებთ. ეს თქვენი პარტიის ახლგაზრდული ასაკის ბრალია თუ რამე სხვა მიზეზია?
_ ახალგაზრდული ასაკის ბრალიცაა და თანაც ზოგიერთ პოლიტიკოსს ჰგონია, რომ ამ ქვეყანაში პოლიტიკური არეალი პრივატიზებულია და ახალ მოთამაშეს პოლიტიკაში შემოსვლის უფლება არ აქვს. ვფიქრობ, ჩვენ ყველა აუცილებლად შევხვდებით ერთმანეთს და მოლაპარაკების მაგიდასთან დავსხდებით. ჩვენ გარკვეული რაოდენობით შევალთ საკრებულოში და მათ უკანდასახევი გზა არ ექნებათ - "სახალხო დემოკრატებთან" მოლაპარაკებები აუცილებლად იქნება საჭირო ყველა პოლიტიკური ძალისთვის. რაც შეეხება "მწვანეებს", ხელისუფლებამ ყველაფერი გააკეთა იმისთვის, რომ ეს პოლიტიკური ძალა არჩევნების მიღმა დაეტოვებინა. მე ეს კონკრეტული პოლიტიკური ძალის დისკრიმინაციად მივიჩნიე. ზოგადად "მწვანე თემატიკა" და ის პოლიტიკური პარტია, რომელიც ეკოლოგიის პრობლემებზე მუშაობს, ჩვენთვის არის ძალიან მნიშვნელოვანი, მისაღები და პრიორიტეტული. ამიტომ, ერთ-ერთ ბრიფინგზე ღიად განვაცხადე, რომ თანახმა ვარ "მწვანეებთან" თანამშრომლობაზე, რადგან ხელისუფლებამ ისინი დაბლოკა, ეს თემა კი ჩვენთვის საინტერესოა. ამის შემდეგ მათ მიიღეს ჩვენი წინადადება და ამ არჩევნებზე ერთი სიითა და ერთი მაჟორიტარული წესით გამოვდივართ.
_ თქვენი თქმით, "ზოგიერთ პოლიტიკოსს ჰგონია, რომ პოლიტიკური არეალი ამ ქვეყანაში პრივატიზებულია", ვის გულისხმობთ "ზოგიერთ პოლიტიკოსში"?
_ ვგულისხმობ ყველას, ვინც მე არ მიმიჩნევს რეალურ კონკურენტად და ვინც არ მიწვევს შეხვედრებზე.
_ ბატონო ნიკა, როგორ ფიქრობთ, რატომ ვერ მოახერხა ოპოზიციურმა სპექტრმა გაერთიანება? ვისი, ან რისი ბრალია ეს და როგორც მერის, ისე ადგილობრივ არჩევნებში გამარჯვების რა შანსი აქვს დაქსაქსულ ოპოზიციას?
_ ამ ეტაპზე ოპოზიციის კრიტიკას არ ვაპირებ და არც მიზეზებზე საუბარი მსურს. მიზეზებზე ვისაუბრებ არჩევნების შემდეგ, როცა ეს ხელისუფლება დამთავრდება და იგი აღარ იქნება თბილისის მმართველი. არჩევნების შემდეგ ყველა ოპოზიციურ სუბიექტს ვეტყვი, ვისთან რა პრეტენზია მაქვს, მაგრამ ახლა ოპოზიციის ერთად დგომაა საჭირო. ერთად დგომაში ერთიან კანდიდატს არ ვგულისხმობ, მხედველობაში მაქვს ერთად დგომა არჩევნების მოსაგებად და ხელისუფლების დასამარცხებლად.
_ როგორ ფიქრობთ, ოპოზიცია, რომ საერთო კანდიდატზე შეჯერებულიყო, ეს ოპოზიციას სარგებელს მოუტანდა თუ პირიქით?
_ საკრებულოს შემთხვევაში, საერთო კანდიდატი ოპოზიციას სარგებელს არ მოუტანდა. საერთო კანდიდატმა ადამიანები, შესაძლოა, არჩევნების დღეს საარჩევნო ურნასთან ვერ მიიყვანოს. ერთ ადამიანს შეიძლება საერთო კანდიდატი არ მოსწონდეს, ან საერთო კანდიდატის გვერდში მდგომი რომელიმე ოპოზიციური ძალა. უფრო საინტერესოდ მიმაჩნია ბევრი კანდიდატი და ჭრელი საკრებულო. რაც შეეხება თბილისის მერის არჩევნებს, ეს კითხვა მე არ მეხება, რადგან ამ პროცესებში სულ რამდენიმე თვეა რაც ჩავერთე. იმ პოლიტიკურმა ძალებმა, რომლებმაც პოლიტიკაში წლების წინ მოვიდნენ, ვერ შეძლეს საერთო კანდიდატზე შეჯერება. "სახალხო დემოკრატები" ვამბობდით, რომ იმ შემთხვევაში, თუ ოპოზიცია საერთო კანდიდატზე შეჯერდებოდა, ჩვენც მის ირგვლივ გავერთიანებოდით, თუმცა ამ პროცესს თავიდანვე სკეპტიკურად ვუყრებდით და რეალურად ვერც განხორციელდა. ასევე მინდა დავაფიქსირო, რომ არავის სასარგებლოდ ჩემი კანდიდატურის მოხსნას არ ვაპირებ.
_ თბილისის ქუჩებში ერთ-ერთი პირველი გამოჩნდა თქვენი სარეკლამო ბანერები, შინაარსით: ნიკა ივანიშვილი _ ოჯახურ გარემოში; ნიკა ივანიშვილი _ მეგობრებთან ერთად. სხვა რის გამო უნდა დაგიჭირონ მხარი ამომრჩევლებმა? გარდა იმისა, რომ მეოჯახე და მეგობრული ხართ?
_ სახელმწიფო სამსახურებში მუშაობის გამოცდილება მაქვს და მოსახლეობას სიახლეს ვთავაზობ. შემიძლია გითხრათ ხელისუფლების დამარცხების ერთი მარტივი ფორმულა: ყველა ოჯახის ერთმა წევრმა ხმა უნდა მისცეს სიახლეს. ოჯახის დანარჩენმა წევრებმა არჩევანი საკუთარი სიმპათიებიდან გამომდინარე გააკეთოს. ეს სიახლე კი არის თბილისში ეკოლოგიური მდგომარეობის გაჯანსაღება. თბილისში 320 000 ოჯახია, გამოდის, 320 000-მა ადამიანმა ხმა რომ მისცეს სიახლეს და "მწვანეს", ხელისუფლება დამარცხდება. ეს არის ხელისუფლების დასამარცხებლად შექმნილი უმარტივესი ფორმულა. თუ ამ ფორმულას ყველა ოჯახი გაითვალისწინებს, თბილისში ხელისუფლება აუცილებლად დამარცხდება. ამას არც საერთო კანდიდატი სჭირდება და არც ერთმანეთზე გადამტერებული ოპოზიციური პარტიები. ამას სჭირდება ფორმულა - თითო ოჯახიდან თითო ხმა. სიახლე, ახალი მიდგომა, ახლაგაზრდა პოლიტიკოსები და ახალი ხედვები _ სწორედ ამის გამო უნდა დაგვიჭიროს ამომრჩეველმა მხარი. ჩვენი პარტიის უამრავ წევრს აქვს სხვადასხვა ადგილობრივ მმართველობით ორგანოებში მუშაობის გამოცდილება. შემიძლია დაგისახელოთ შოთა ხაბარელის სახელი და გვარი. მან იმ კონკრეტულ საქმეში, რომელსაც ემსახურებოდა, წარმატებას მიაღწია და ახლა გამოთქვა პოლიტიკაში მოსვლის სურვილი. იმედი მაქვს, აქაც ოლიმპიური ოქროს მედლის დონის წარმატებას მიაღწევს. გვიყვარს ჩვენი ქალაქი და ყველაფერს გავაკეთებთ, რომ ამ ქალაქში ადამიანები კარგად ცხოვრობდნენ. ჩვენთვის მუღებელია ფასადური მიდგომა. გავაკეთებთ იმას, რაც ადამიანებს უნდათ და არა რაღაც ფასადებსა და კოსმოსურ ხიდებს.
_ ამის პასუხად, წინასაარჩევნო კამპანიის დროს განაცხადეთ, რომ იმ შემთხვევაში, თუ თბილისის მერი გახდებოდით, დავით აღმაშენებლის ძეგლს პირვანდელ ადგილას დააბრუნებდით. აქვე მეტროსადგურ "უნისვერსიტეტის" შეჩერებული მშენებლობის აღდგენის პირობის გახსენებაც შეიძლება. როგორ ფიქრობთ, ამ ეტაპზე ეს თბილისის მოსახლეობისთვის პრობლემაა?
_ აქ საუბარი იყო ადამიანებთან დამოკიდებულებაზე. მე გავაპროტესტე ხელისუფლების დამოკიდებულება ისეთი ღვაწლმოსილი და დამსახურებული ადამიანის მიმართ, როგორიცაა მერაბ ბერძენიშვილი. ვაპროტესტებ იმასაც, რომ თაბუკაშვილის ქუჩის მოსახლეობას საკუთარი სახლებიდან ყრიდნენ. ეს ხელისუფლება კი დღეს მოგვევლინა პურის მცხობლად, მშენებლად და ცდილობენ, "პიარით" დაავიწყონ მოსახლეობას ყოველივე ცუდი, რაც ამ ხნის განმავლობაში გაუკეთეს. ძეგლის დაბრუნების საკითხი თუ დადგება დღის წესრიგში, აუცილებლად დავაბრუნებ. ჩემი დაპირებაა, რომ მეტროსადგურ "უნივერსიტეტს" აღვადგენ. ჩვენი ერთ-ერთი დაპირება, გაზის დავალიანების გადავადება, ხელისუფლებამ მიითვისა და მოსახლეობას დავალიანება 5 თვით გადაუვადა, ოღონდ იმიტომ, რომ მას ეს წინასაარჩევნოდ სჭირდება.
_ კონკრეტულად რომ მითხრათ, რა მიმართულებით გადადგამს ნიკა ივანიშვილი ქმედით ნაბიჯებს გამარჯვების შემთხვევაში. თქვენი აზრით, რა პრობლემები აწუხებს თბილისის მოსახლეობას ყველაზე მეტად?
_ პრიორიტეტი არის ადამიანი, მოქალაქე. ის ინდივიდები, რომლებიც ქმნიან სახელმწიფოს. თუ მე გავხდები თბილისის მერი, ამ ქალაქში პოლიტიკური ნიშნით ვერავის დაიჭერენ. ყველა სასამართლოში გამოვალ ამ ადამიანების დამცველად. თუ ეჭვი მაინც გაჩნდება იმისა, რომ პოლიტიკური შეხედულებების გამო დააკავეს კონკრეტული ადამიანი, ეს პროცესები იქნება ღია. პრიორიტეტი იქნება მცირე მეწარმეები, რომლებიც ქუჩებში დგანან. ვეცდები მათ გადასახადებისგან გათავისუფლებას, იმისათვის, რომ ბიზნესი განავითარონ. პრიორიტეტი იქნება მეტროს მშენებლობა, რაც ხალხს მოძრაობას გაუადვილებს და თან ხაზი მინდა გავუსვა, რომ ეს არის ეკოლოგიურად სუფთა ტრანსპორტი. პირობას ვიძლევი, რომ გამარჯვების შემთხვევაში, მერი ერთპიროვნულ გადაწყვეტილებებს არ მიიღებს და ქალაქის მოსახლეობის აზრს გაითვალისწინებს.
_ თქვენ ერთ-ერთი პირველი იყავით, ვინც გია გაჩეჩილაძის იმავე "უცნობის", თბილისის მერის არჩევნებში მონაწილეობას მიესალმა. შემდეგ აღმოჩნდა, რომ მისი განცხადება ერთგვარი ხუმრობა იყო. საზოგადოების თვალში კი გამოჩნდა, რომ ნიკა ივანიშვილი ხუმრობას წამოეგო...
_ ჩვენ იუმორით სავსე ხალხი ვართ და მის ხუმრობას იუმორით მივუდექით. თუ ეს ხუმრობა არ იყო, გია გაჩეჩილაძე საქართველოს ისეთივე მოქალაქე და თავისუფალი ადამიანია, როგორც ნიკა ივანიშვილი. თუ მან გადაწყვიტა, რომ კენჭი იყაროს, ამის სრული უფლებაც აქვს. ეს უკვე მისი სამსახიობო ნიჭის გამოვლინება იყო და მან ხალხი კარგ ხასიათზე დააყენა. მე მის ორივე ნაბიჯს მივესალმები, როგორც კომიკურს, ისე სერიოზულს.
_ საქართველოში ყოველი არჩევნების დასრულების შემდეგ სხვადასხვა პოლიტიკური სუბიექტის მხრიდან უამრავი პრეტენზია ისმის ხოლმე. მათ შორის მოსახლეობის მისამართითაც, რომ ამომრჩევლებმა ხმები გაყიდეს და ასე შემდეგ. როგორი იქნება დამარცხების შემთხვევაში თქვენი პოზიცია მოსახლეობასთან მიმართებაში?
_ ეს მოსახლეობის გადასაწყვეტია. ისინი თავისუფალი ადამიანები არიან. ვისაც უნდა, ფული აიღოს, ვისაც უნდა, თავისი შეხედულებებიდან გამომდინარე მისცეს ხმა. პრობლემა არ არის. პრობლემა ისაა, რომ ხელისუფლებას ნაწილობრივ შესაძლოა უკვე გაყალბებული ჰქონდეს ეს არჩევნები. პრობლემაა ის, რომ ქვეყანაში დამოუკიდებელი სასამართლო არ არსებობს და თუ საარჩევნო პროცესთან დაკავშირებით რაიმე დარღვევას აღმოვაჩენთ, სასამართლო მას არ გაითვალისწინებს. "სახალხო დემოკრატებს" ხალხთან პრობლემა არასდროს ექნებათ.
_ გაყალბება ახსენეთ და რას მოიმოქმედებს ნიკა ივანიშვილი იმ შემთხვევაში, თუ არჩევნები გაყალბდება? როგორ დაიცავთ თქვენი ამომრჩევლის ხმებს?
_ კონსტიტუციის ფარგლებში ვიმოქმედებთ არსებული გაყალბების წინააღმდეგ, მათ შორის არათავისუფალ სასამართლოში საჩივრის შეტანის სახითაც და არ გამოვრიცხავ საპროტესტო აქციებსაც, თუმცა კონსტიტუციის ფარგლებში.
_ საპროტესტო აქციების გამართვის შემთხვევაში, შეუერთდებით თუ არა იმ პოლიტიკურ ძალებს, რომლებთანაც მანამდე არ თანამშრომლობდით, იმავე "ეროვნულ საბჭოს"?
_ ყველასთან ვითანამშრომლებ, მათ შორის ისეთ ოპონენტთანაც, როგორიც "ნაციონალური მოძრაობაა" და რომლებიც ჩვენ საერთოდ ადამიანებად არ მიგვიჩნევენ. ყველასთან ერთად მივუსხდებით მოლაპარაკების მაგიდას. რა საკითხებზედაც შევთანხმდებით, ღიად გამოვიტანთ საზოგადოების წინაშე და რაზედაც ვერ შევთანხმდებით, იმასც გამოვიტანთ ხალხის სამსჯავროზე. აქვე უნდა აღვნიშნო, რომ ხელისუფლების რევოლუციის გზით შეცვლის წინააღმდეგი ვარ. ყველას დავუპირისპირდები, ვინც რევოლუციას მოინდომებს. თავის დროზე ვარდების რევოლუციის მოწინააღმდეგეც ვიყავი. ყველანაირი რევოლუცია ჩვენი ქვეყნისთვის არის დამღუპველი. ეს ქვეყანა განვითარდება დემოკრატიული პროცესებითა და არჩევნებით. როდესმე ეს ხელისუფლება არჩევნების გზით უნდა წავიდეს.
_ რა აზრის ხართ "ეროვნული საბჭოს" ლიდერების მოსკოვში ვიზიტებზე?
_ ამაში ტრაგედიას ვერ ვხედავ. ეს არის ამომრჩევლების გადასაწყვეტი. ვინც მათ მოქმედებებს უჭერს მხარს, მივა არჩევნებზე და ხმას მისცემს "ეროვნულ საბჭოს". რუსეთთან უნდა გვქონდეს კარგი მეზობლური ურთიერთობა. ჩვენ უნდა გავითვალისწინოთ მათი ინტერესები, მათ უნდა გაითვალისწინონ ჩვენი ინტერესები, მაგრამ ახლა ჩვენმა ხელისუფლებამ ყველაფერი უნდა გააკეთოს, რომ ორი მხარე მოლაპარაკებების მაგიდასთან დაჯდეს და კავშირები დამყარდეს. ჩვენი ხელისუფლება ვერც აფხაზებთან საუბრობს, ვერც ოსებთან და ვერც რუსეთთან. ხელისუფალს უნდა ეყოს იმის გამბედაობა, რომ ის, რა ცუდიც რუსეთს გაუკეთებია, გულში დაილექოს და მოლაპარაკებების მაგიდას მიუჯდეს.
_ ოპოზიციას რამდენად შეუძლია რუსეთთან ურთიერთობების მოგვარება?
_ ოპოზიცია ცდილობს. ოპოზიცია თამაშობს ამომრჩევლებზე. მე რუსეთში ვერ დავდივარ და არც ერთ რუსულ პოლიტიკურ ძალასთან ხელშეკრულებას არ ვაფორმებ. ეს ნაბიჯი პირველ რიგში ხელისუფლებამ უნდა გადადგას, რადგან ოპოზიციას შესაბამის ბერკეტები არ აქვს. რა ბერკეტი აქვს, მაგალითად, ნოღაიდელს, რომელმაც "ედინაია რასიასთან" ხელშეკურლება გააფორმა?! ეს იყო "პიარაქცია" და სხვა არაფერი. ასეთი ვოიაჟებით ხელისუფლება უნდა დაკავდეს.
_ დავუბრუნდეთ ისევ თბილისის მერის არჩევნებს. ყოველივე ზემოთქმულის გათვალისწინებით, არჩევნებში გამარჯვების რა შანსი აქვს ნიკა ივანიშვილს?
_ წინასწარ ამის თქმა ძნელია. ლელა კაკულია არ ვარ, რომ ასეთი რამ ვიწინასწარმეტყველო. თუმცა ვხვდები მოსახლეობას და ვხედავ, რომ მათი უმრავლესობა გულგატეხილია საქართველოში მოქმედი პოლიტიკური ძალების მოქმედებებით. ვფიქრობ, სიახლე მათთვის საინტერესო იქნება. აღნიშნული შეხვედრები მაძლევს იმის თქმის საშუალებას, რომ ძალიან კარგ შედეგებს მივაღწევთ ადგილობრივ არჩევნებში და არ გამოვრიცხავ, ნიკა ივანიშვილი თბილისის მერი გახდეს.
_ მიუხედავად იმისა, რომ საარჩევნო პროგრამები ჯერ არ წარმოგიდგენიათ?
_ ჩვენ გვაქვს პროგრამები სოციალურ საკითხებზე, რომლებიც ქვეყანაში დაზღვევის სამფაზიან პროგრამას ითვალისწინებს და რომელთა მიხედვითაც ხელისუფლებამ გარკვეული სოციალური ფენის ადამიანების დაზღვევა საკუთარ თავზე უნდა აიღოს. ამ პროგრამებს ბუკლეტების სახით დავბეჭდავთ და კარდაკარ, თითოეულ თბილისელს გავაცნობთ.