თბილისის მუნიციპალიტეტის საკრებულოს გლდანის რაიონის მაჟორიტარი დეპუტატის ნინო გოგუაძის ინიციატივით, საკრებულოს თავმჯდომარე გიორგი ალიბეგაშვილი და საკრებულოს დეპუტატები ბუნებრივი აირის აფეთქების შედეგად დაზარალებულ მოსახლეობას შეხვდნენ.
შეხვედრა გლდანში მდებარე სასტუმრო „დეკადე“-ში გაიმართა, სადაც ამავე რაიონის IV მკრ-ში მომხდარი ბუნებრივი აირის აფეთქების დროს დაზარალებული ოჯახები ცხოვრობენ.
„ამ სასტუმროში 45 დაზარალებული ოჯახი ცხოვრობს. მათი სახლების რეაბილიტაცია დაწყებულია და მუშაობა ინტენსიურად მიმდინარეობს. ვცდილობთ, რაც შეიძლება მალე უზრუნველვყოთ დაზარალებულების თავიანთ საცხოვრებელ სახლებში დაბრუნება“, - განაცხადა მაჟორიტარმა დეპუტატმა ნინო გოგუაძემ.
შეხვედრაზე, რომელსაც გლდანის რაიონის გამგებელი ბესიკ ქარცივაძე ესწრებოდა, წარმომადგენლობითი ორგანოს წევრებმა დაზარალებულ მოსახლეობას სარეაბილიტაციო სამუშაოების მიმდინარეობა გააცნეს და შესრულებული სამუშაოს შესახებ ინფორმაცია მიაწოდეს.
„დღეს ჩვენ აფეთქების შედეგად დაზიანებული საცხოვრებელი სახლების სარეაბილიტაციო სამუშაოებს გავეცანით და დაზარალებულ მოსახლეობას სამუშაოების მიმდინარეობის თაობაზე მივაწოდეთ ინფორმაცია.
იმედს გამოვთქვამ, რომ არსებული პრობლემების აღმოფხვრას ერთმანეთის თანადგომითა და ძალისხმევით უახლოეს მომავალში შევძლებთ“,-განაცხადა დიდუბის რაიონის მაჟორიტარმა დეპუტატმა ვლადიმერ ძნელაძემ.