თბილისის მუნიციპალიტეტის საკრებულოს მთაწმინდის რაიონის მაჟორიტარი დეპუტატი ჯაბა ჯიშკარიანი ამავე რაიონის გამგებელთან გელა არჩვაძესთან ერთად ბროსესა და ჯამბულის ქუჩების მოსახლეობას შეხვდა.
დეპუტატმა და გამგეობის წარმომადგენლებმა რამდენიმე პრობლემური ეზო პირადად დაათვალიერეს და მოსახლეობას დახმარებას დაჰპირდნენ.
,,ჯამბულის ქუჩაზე ერთ-ერთ საცხოვრებელ სახლში თაღი საჭიროებს გამაგრებას. ჭერიდან ცვივა ნანგრევები და მოსახლეობა საფრთხის წინაშეა. გამგებელთან ერთად პრობლემებს ადგილზე გავეცანი, უახლოეს მომავალში კი პროცესში შესაბამისი სამსახურები ჩაერთვებიან და ყველა ინფრასტრუქტურული სამუშაოები გეგმის მიხედვით ჩატარდება“,- განაცხადა ჯაბა ჯიშკარიანმა.
დღესვე მთაწმინდის რაიონის მაჟორიტარმა დეპუტატმა გამგეობის წარმომადგენლებთან ერთად ბროსეს ქუჩაზე მცხოვრები სხილაძეების ოჯახი მოინახულა, რომლებმაც დეპუტატს შეზღუდული შესაძლებლობების მქონე შვილისთვის კიბის კეთილმოწყობა სთხოვეს.
როგორც გელა არჩვაძემ განაცხადა, პანდუსის მოსაწყობად, პირველ ეტაპზე, ტექნიკური მდგომარეობის შესწავლა მოხდება, რის შემდეგაც შესაბამისი ღონისძიებები გატარდება. თბილისის მუნიციპალიტეტის საკრებულოს მთაწმინდის რაიონის მაჟორიტარი დეპუტატი ჯაბა ჯიშკარიანი მის სამაჟორიტარო ოლქში მცხოვრებ მოსახლეობას პერმანენტულად ხვდება, პრობლემებს ადგილზე ეცნობა და შესაბამის სამსახურებთან შუამდგომლობის საფუძველზე მათთვის მნიშვნელოვანი საკითხების მოგვარებაში ეხმარება.