საქართველოს რეგიონული განვითარებისა და ინფრასტრუქტურის მინისტრის მოადგილემ თენგიზ შერგელაშვილმა სამინისტროს მიერ მომზადებული კანონპროექტების: „მაღალმთიანი რეგიონების განვითარების შესახებ“ და „ადგილობრივი თვითმმართველობის კოდექსში ცვლილებებისა და დამატებების შესახებ“ საქართველოს პარლამენტის მიერ მესამე მოსმენით მიღებაზე ისაუბრა. „მაღალმთიანი რეგიონების შესახებ“ კანონი ითვალისწინებს პრემიერ-მინისტრის ხელმძღვანელობით მთის ეროვნული საბჭოს შექმნას, რომლის წინადადებების საფუძველზე საქართველოს მთავრობა, გარკვეული კრიტერიუმების მიხედვით, მთაში მდებარე დასახლებებს მიანიჭებს მაღალმთიანი დასახლების სტატუსს. ეს იმას ნიშნავს, რომ ამ დასახლებაში მდებარე საწარმოები ისარგებლებენ საგადასახადო შეღავათებით, ხოლო იქ მუდმივად მცხოვრებ მოსახლეობას დაუწესდება სოციალური შეღავათები, მაგ. ფინანსური დახმარება ყველა ახალშობილზე ერთ წლამდე, ხოლო მესამე და შემდგომ შვილზე -2 წლის ასაკამდე, სახელფასო დანამატები პედაგოგებისა და მედიცინის მუშაკებისათვის, სოციალური დახმარება პენსიონერებისათვის, შეღავათები ელ. ენერგიითა და ბუნებრივი გაზით სარგებლობისას და ა.შ.
ადგილობრივი თვითმმართველობის კოდექსში შეტანილი ცვლილებებით და დამატებებით შეიცვალა ამ ორგანული კანონის ის თავი, რომელიც ეხება თვითმმართველობაში მოქალაქეთა მონაწილეობას. მუნიციპალური ორგანოები ვალდებული გახდნენ, მათ მიერ მიღებული ნორმატიული აქტების გარდა, კანონით დადგენილ ვადებში პროაქტიულად გამოაქვეყნონ ისეთი დოკუმენტები, რომლებიც საზოგადოებისათვის არის საინტერესო. გამჭვირვალობის უფრო მაღალი სტანდარტების დასამკვიდრებლად, დაიხვეწა კოლეგიური ორგანოების სხდომებზე მოქალაქეთა უშუალო დასწრებისა და საკითხების განხილვაში მონაწილეობის გარანტიის მომცემი საკანონმდებლო დებულებები.
ზემოხსენებული საკანონმდებლო ცვლილებების მიხედვით, გაფართოვდა იმ საკითხების არეალი, რომლებზეც მოსახლეობას შეეძლება, მუნიციპალიტეტს პეტიციის მეშვეობით მოსთხოვოს აქტუალური პრობლემის შესწავლა და გადაწყვეტილების მიღება. კანონპროექტით, დაკონკრეტებული და გამარტივებულია პეტიციის წარდგენის პროცედურები. ფაქტიურად, მოსახლეობას შეეძლება მუნიციპალურ ორგანოებს მიმართოს ყველა პრობლემურ საკითხზე, მუნიციპალიტეტი კი ვალდებული იქნება, განიხილოს ეს საკითხი და საჯაროდ გასცეს პასუხი პეტიციის ინიციატორებს.
კანონმა გააძლიერა მოსახლეობისადმი მუნიციპალიტეტის არჩეულ პირთა ანგარიშვალდებულება და ისინი ვალდებული იქნებიან პერიოდულად, საჯარო შეხვედრებზე ჩააბარონ ამომრჩევლებს ანგარიშები გაწეული მუშაობის შესახებ. ასეთ შეხვედრებზე მოქალაქეები შეძლებენ თავისუფლად და შეუზღუდავად დაუსვან შეკითხვები არჩეულ პირებს, შეაფასონ მათი საქმიანობის ეფექტურობა და გამოთქვან თავისი აზრი პრობლემებზე.
ახალი კანონით, ყველა მუნიციპალიტეტში დამკვიდრდება მოქალაქეთა მონაწილეობის ახალი ფორმები: არასამთავრობო და კერძო სექტორის წარმომადგენლებისაგან მუნიციპალიტეტებში შეიქმნება სამოქალაქო მრჩეველთა საბჭოები, რაც ხელს შეუწყობს სამოქალაქო საზოგადოებასთან და ადგილობრივ ბიზნესთან მუნიციპალიტეტის თანამშრომლობას; დასახლების მცხოვრებლებს საერთო კრებებზე შეეძლებათ მუნიციპალიტეტის ორგანოების წინაშე დასვან მათთვის მნიშვნელოვანი საკითხები, უშუალოდ მიიღონ მონაწილეობა მათ გადაწყვეტაში. მოსახლეობის ჩართულობა ადგილობრივი თვითმმართველობის განხორციელებაში უზრუნველყოფილი იქნება როგორც პირდაპირ, ასევე არჩეული საზოგადოებრივი წარმომადგენლების საშუალებით.
