თბილისის ზღვაზე დღეს ოლიმპიური სოფელი ოფიციალურად გაიხსნება. ათლეტების სოფელს, რომელშიც ოლიმპიური ფესტივალის დროს 4 000-მდე სპორტსმენი და ოფიციალური პირი იცხოვრებს, საქართველოს პრემიერ-მინისტრი ირაკლი ღარიბაშვილი ოფიციალურად გახსნის. ევროპის მე-13 ახალგაზრდული ოლიმპიური ფესტივალი "თბილისი 2015"-ის ფარგლებში, ოლიმპიური სოფელი თბილისის ზღვის მიმდებარე ტერიტორიაზე 50 000 კვ.მ ფართობზეა გაშენებული. პროექტის სამშენებლო სამუშაოებს ჩინური კორპორაცია "ჰუალინგ ჯგუფი" აწარმოებდა. კომპლექსი 9 საცხოვრებელ კორპუსს, ხუთვარსკვლავიან სასტუმროს, სპორტულ-გამაჯანსაღებელ ცენტრს, რესტორანსა და რეკრეაციულ ზონას აერთიანებს. ოლიმპიური ფესტივალი "თბილისი 2015" 26 ივლისიდან 1 აგვისტოს ჩათვლით გაიმართება. ფესტივალის განმავლობაში თბილისს 50 ქვეყნის 4000-მდე მონაწილე ეწვევა.
