ბათუმის მერია შესაბამის პირებს სანიტარული და ჰიგიენური ნორმების დაცვისკენ მოუწოდებს, წინააღმდეგ შემთხვევაში, ადმინისტრაციულ სამართალდარღვევათა კოდექსით დადგენილ ზომებს გაატარებს.
როგორც ქ. ბათუმის მერიის ზედამხედველობის სამსახურის განცხადებაშია აღნიშნული, ტურისტული სეზონი აქტიურ ფაზაში შევიდა და ქ. ბათუმის მუნიციპალიტეტის მერიის მიერ, ადგილობრივი მოსახლეობის თუ ქალაქის სტუმრებისთვის, მაქსიმალური კომფორტისა და სათანადო პირობების შექმნისთვის შესაბამისი ღონისძიებები ხორციელდება.
,,მიუხედავად ამისა, ბოლო პერიოდში, ქალაქის ცენტრალურ ნაწილსა და ტურისტულ ზონებში, ყოველგვარი სამართლებრივი საფუძვლის და უსაფრთხოების ტექნიკური პირობების, სანიტარული და ჰიგიენური ნორმების დაცვის გარეშე, ქალაქის იერსახის დამახინჯებით, ცალკეული პირების მიერ კუსტარული წესით დამზადებული აპარატებით და კონსტრუქციებით, სხვადასხვა სახის საკვები პროდუქციით უნებართვო გარევაჭრობის ფაქტები გახშირდა. ამასთან, იზღუდება საფეხმავლო, ავტომობილების და ველობილიკების სავალ ნაწილზე მოძრაობა. ქალაქ ბათუმის მერიის მხრიდან არაერთგზის განმარტებისა და გაფრთხილების მიუხედავად, შედეგი არ დადგა. საერთო ჯამში, ეს ქმნის დისკომფორტს და ეწინააღმდეგება დადგენილ წესებს, რაც სამართლიან უკმაყოფილებას და პროტესტს იწვევს საზოგადოებაში”, _ნათქვამია ქ. ბათუმის მერიის ზედამხედველობის სამსახურის განცხადებაში.
ბათუმის მერიის ზედამხედველობის სამსახური კიდევ ერთხელ მოწოდებს ადრესატებს დაემორჩილონ თვითმმართველობის კანონიერ მოთხოვნებს. წინააღმდეგ შემთხვევაში, ქ. ბათუმის მუნიციპალიტეტის მერია გაატარებს ადმინისტრაციულ სამართალდარღვევათა კოდექსით დადგენილ ზომებს.