არქიტექტორი გიგა ბათიაშვილი აცხადებს, რომ ახალი გზის დროებით აღდგენა სექტემბრამდე უნდა მოხდეს, წინააღმდეგ შემთხვევაში ქალაქის სატრანსპორტო სისტემაში მძიმე მდგომარეობა შეიქმნება.
არქიტექტორმა დღეს გამართულ პრესკონფერენციაზე განაცხადა, რომ დედაქალაქის ხელმძღვანელობასტან სპეციალისტებს არაერთი შეხვედრა ჰქონდათ და მერიას ახალი გზის მოშლილი მონაკვეთის დროებით აღდგენის რეკომენდაცია მისცეს.
"მოდის სექტემბერი, სწავლის დაწყების, მოსახლეობის რეგიონებიდან თბილისში დაბრუნების პერიოდი, თუ ამ დროისთვის გზა არ იქნება ამუშავებული, ამან შესაძლოა სატრანსპორტო სისტემაში ძალიან მძიმე შედეგები გამოიწვიოს. ამდენად, მივიღეთ გადაწყვეტილება, ქალაქიც დაეთანხმა, რომ მოშლილი მონაკვეთი იყოს დროებით აღდგენილი”, - აღნიშნა ბათიაშვილმა.
მისივე თქმით, უნდა დამუშავდეს ახალი პროექტი და ძირითადი ყურადღება გადატანილი იყოს თბილისის ზევით, მდინარე ვერეზე რამდენიმე კაშხლის აშენებაზე, რომელიც წყალდიდობის დროს წყლებს დააგუბებდა. მაგრამ არქიტექტორის განმარტებით, ქრესტომატიული გადაწყვეტილება არსებობს, რომ ქალაქების თავზე დამბები არ აშენდეს, რადგან რისკის ფაქტორი მაინც რჩება.
ბათიაშვილის ინფორმაციით, თვის ბოლოს, სხვადასხვა ჯგუფებმა თბილისის გენგეგმის შესაქმნელად კონცეფცია უნდა წარადგინონ.