აჭარის მთავრობის თავმჯდომარემ არჩილ ხაბაძემ ადგილობრივ მუსლიმებს დიდი მარხვის დასრულება რამაზან ბაირამი მიულოცა და ბათუმის მეჩეთში დღესასწაულთან დაკავშირებულ ლოცვას დაესწრო.
აჭარის პირველ პირთან ერთად რეგიონის სოფლის მეურნეობისა და განათლების, კულტურისა და სპორტის მინისტრები იმყოფებოდნენ.
რელიგიურ რიტუალს დასავლეთ საქართველოს მუფთი ბეგლარ ქამაშიძე უძღვებოდა.
რამაზანის მარხვის დროს განთიადიდან მზის ჩასვლამდე მუსლიმები ყოველგვარ საჭმელსა და სასმელზე უარს ამბობენ. მარხვის დასრულების დღეს მუსლიმები ტრადიციულ ტკბილეულს ჰალვას ამზადებენ, წინაპრების საფლავებს მოინახულებენ და ნათესავებს სტუმრობენ.
„პირველ რიგში დიდი მოწიწებით და პატივისცემით ვულოცავ ყველა მუსლიმს ამ დღესასწაულს. მე მინდა გითხრათ, რომ ძალიან რთულა მარხვის პერიოდი. 29 დღის განმავლობაში ყველა მუსლიმი ემსახურება ღმერთს, სჩადის კეთილ საქმეებს, ამიტომ ეს განსაკუთრებული დღეებია. ყველა მუსლიმს მინდა ვუსურვო წარმატებები, სიყვარული, ბედნიერება. სახელმწიფო ყოველთვის გადადგამს იმ ნაბიჯებს, რაც საჭირო იქნება ყველა აღმსარებლის მიმართ პატივისცემისთვის,“ - განაცხადა არჩილ ხაბაძემ.
