19 ივლისს 16:00 საათზე ჩოხატაურის მუნიციპალიტეტში საქართველოს პარლამენტის ეროვნული ბიბლიოთეკის გენერალური დირექტორის გიორგი კეკელიძისა და მედიასახლ ”გურია ნიუსის” ინიციატივით თბილისის 13 ივნისის სტიქიის დროს დაღუპული ივლიტა ჯიბუტის სახელობის ბიბლიოთეკა გაიხსნება.
ჩოხატაურში მედიასახლ ”გურია ნიუსის” ოფისში ივლიტა ჯიბუტის სახელობის ბიბლიოთეკისთვის ფართი გამოიყო, რომელიც მოხალისეების ძალისხმევით გარემონტდა და კომპიუტერებითა და სხვა ტექნიკური საშუალებებით აღიჭურვა.
საქართველოს პარლამენტის ეროვნული ბიბლიოთეკის თანამშრომლებმა ივლიტა ჯიბუტის სახელობის ბიბლიოთეკისთვის წიგნები შეიძინეს. ბიბლიოთეკას წიგნები გადასცეს ასევე გამომცემლობებმა და კერძო პირებმა. პირველ ეტაპზე ბიბლიოთეკა ათასზე მეტი წიგნით დაკომპლექტდება.
ივლიტა ჯიბუტის სახელობის ბიბლიოთეკაში მკითხველებს უახლესი ლიტერატურის გაცნობის, ინტერნეტის შეუზღუდავი წვდომისა და სხვადასხვა სახის შეხვედრების მოწყობის შესაძლებლობა ექნებათ.
