20 ივლისს, 16:00 საათზე, თბილისის ადამიანის უფლებათა სახლში, საქართველოში მცხოვრებ ბოშათა პრობლემებზე, მრგვალი მაგიდა გაიმართება.
თბილისის ადამიანის უფლებათა სახლის უფლებადამცველების მობილური ჯგუფი დახმარებას უწევს გაჩიანსა და სამგორის რაიონში მცხოვრებ ბოშებს, რომელთათვის პრობლემას წარმოადგენს დოკუმენტაციის მოწესრიგება.
ბოშებს, ენის ბარიერის გამო, უჭირთ ადმინისტრაციულ ორგანოებთან კომუნიკაცია.
აღსანიშნავია, რომ საქართველოში დაბადებულ ბოშებს არ აქვთ დაბადების მოწმობები, რადგან ვერ დგინდება მათი დაბადების ფაქტი. აღნიშნული პრობლემიდან გამომდინარე, ისინი პირადობის მოწმობებსა და პასპორტებსაც ვერ იღებენ. ზემოაღნიშნულიდან გამომდინარე, ბოშები ვერ სარგებლობენ სამოქალაქო უფლებებითა და რიგი შეღავათებით. (სოციალური დახმარება, დაზღვევა და ა.შ.) რა თქმა უნდა, პრობლემას წარმოადგენს ბოშა ბავშვების განათლებაც, რადგან დოკუმენტაციის არ ქონა ხელს უშლის მათ განათლების მიღებაში.
რაც შეეხება გარდაბნის მუნიციპალიტეტში მცხოვრებ ბოშებს, მათ უმეტესობას, საკუთრების უფლების რეგისტრაცია სურს. გარდა ამისა, გაჩიანის დასახლებაში მცხოვრებ ბოშებს უამრავი სოციალური პრობლემა აქვთ, არ აქვთ: წყალი, ბუნებრივი აირი, ელექტროენერგია. სოფელში, აგრეთვე, არ არის საბავშვო ბაღი და სკოლა. ეს არასრული ჩამონათვალია იმ პრობლემებისა, რაც საქართველოში მცხოვრებ ბოშებს ექმნებათ.
დისკუსიაზე მომხსენებლები იქნებიან:
ნინო ელბაქიძე - თბილისის ადამიანის უფლებათა სახლის გამგეობის თავმჯდომარე;
ეკა ქობესაშვილი - თბილისის ადამიანის უფლებათა სახლის იურისტი;
ელენე პროშიკიანი - უმცირესობის საკითხთა ევროპული ცენტრის პროექტების ასისტენტი;
ნარგიზ ჯინჭარაძე - ორგანიზაციის - „ეთნიკურ უმცირესობათა უფლებების დასაცავად“ -ხელმძღვანელი.
მისამართი: გაგარინის მოედანი, მე-2 შესახვევი, მელიტონ ქანთარიას 11 ა. საკონფერენციო დარბაზი (ნულოვანი სართული).
