თბილისის მერი დავით ნარმანია მსოფლიო ბანკისა და გაეროს განვითარების პროგრამის ექსპერტების მონაწილეობით, 13 ივნისს მომხდარი სტიქიის ზონაში არსებული მდგომარეობის შეფასებისა და რეკომენდაციების შესახებ მომზადებულ პირველად მონაცემებს გაეცნო. პრეზენტაციას გარემოსა და ბუნებრივი რესურსების დაცვის მინისტრი გიგლა აგულაშვილი, რეგიონალური განვითარებისა და ინფრასტრუქტურის მინისტრი ნოდარ ჯავახიშვილი, თბილისის ვიცე-მერი დიმიტრი ქუმსიშვილი და მერიის საქალაქო სამსახურის ხელმძღვანელები ესწრებოდნენ. მსოფლიო ბანკისა და გაეროს განვითარების პროგრამის ექსპერტების მიერ შემუშავდა მოკლე, საშუალო და გრძელვადიანი რეკომენდაციები თუ რა ღონისძიებები უნდა გატარდეს კატასტროფათა რისკის შესამცირებლად. თბილისის მერის დავით ნარმანიას განცხადებით, მნიშვნელოვანია რომ პროცესში დონორი ორგანიზაციები აქტიურად ჩაერთონ.საქართველოში გაეროს განვითარების პროგრამის ხელმძღვანელის შომბი შარპის განცხადებით, დოკუმენტის მომზადების მთავარი მიზანი იმ საჭიროებების შეფასება იყო, რომელიც 13 ივნისის სტიქიას მოჰყვა.
