16 ივლისს, ”ექსპო ჯორჯიაში” , საერთაშორისო ორგანიზაცია ”ოქსფამის” საქართველოს წარმომადგენლობის მიერ ორგანიზებული კამპანიის ”ქალები, როგორც სრუფასოვანი კვების მხარდამჭერები” გამარჯვებულთა დაჯიდლოვების ცერემონია გაიმართება. კამპანია იმართება ევროკავშირის მიერ დაფინანსებული პროექტის ”ეროვნული სასურსათო უსაფრთხოებისა და მცირე ფერმერების მხარდაჭერა სამხრეთ კავკასიაში” ფარგლებში.
დაჯილდოვების ცერემონიამდე, ნუტრიციის კვლევის მიზნების, მოსალოდნელი შედეგებისა და მეთოდოლოგიის მიმოხილვა გაიმართება, რომელსაც ოქსფამი და ბიოლოგიურ მეურნეობათა ასოციაცია ”ელკანა” კვლევით ორგანიზაცია ”ეი სი თი”-ისთან ერთად ახორციელებენ. აღნიშნული კვლევა ეროვნული მასშტაბით პირველად ტარდება საქათველოში და მიზნად ისახავს ჯანსაღი კვების პრაქტიკის შესწავლას საქართველოს მოსახლეობაში.
ღონისძიებაში მონაწილეობას მიიღებენ საქართველოს სოფლის მეურნეობის, შრომის, ჯანმრთელობისა და სოციალური დაცვის სამინისტროს ოფიციალური პირები, ნუტრიციის დარგის წამყვანი სპეციალისტები, სამთავრობო სტრუქტურების, ევროკავშირისა, საერთაშორისო ორაგნიზაციებისა და სამოქალაქო საზოგადოების წარმომადგენლები.
ოქსფამის ყოველწლიური გლობალური კამპანია მიზნად ისახავს აქტიური და მისაბაძი ქალების წარმოჩენას, მათ საყოველთაო დისკუსიაში ჩართვას და საზოგადოებაში მათი როლის გაძლიერებას; ასევე – ცნობიერების ამაღლებას იმ საქმიანობების შესახებ, რომლითაც მათ განსაკუთრებული წვლილი შეაქვთ ჯანსაღი საკვების მოხმარებასა და წარმოებაში.
მიმდინარე წელს ოქსფამის ინიციატივით და ბლოგერების დახმარებით კამპანიის ფარგლებში პოპულარიზაცია გაეწია ქალის მნიშვნელოვან როლს სრულფასოვანი კვების საკითხებში.
ჯანსაღი და სრულფასოვანი კვება განსაზღვრავს არა მარტო ჩვენი ცხოვრების ხარისხს, არამედ მომავალი თაობების ჯანმრთელობასაც. საყურადღებოა ის პრობლემა, რომ საქართველოში სრულფასოვან კვებასთან დაკავშირებული მონაცემები ძალიან მწირია. არ არსებობს სასურსათო უსაფრთხოებისა და ნუტრიციის ცენტრალიზებული მონიტორინგის სისტემა რაც საშუალებას მისცემს სახელმწიფოს თვალყური ადევნოს სრულფასოვან კვებასთან დაკავშირებულ ვითარებას.
