თბილისის მერია ,,სამართლიან არჩევნებს” საჯარო მოხელეთა კონკურსის გასაუბრების ეტაპზე დაკვირვების საშუალებას არ აძლევს, - ამის შესახებ ორგანიზაციის მიერ გავრცელებულ განცხადებაშია ნათქვამი.
"2015 წლის 7 ივლისს თბილისის მერიაში კონკურსის გასაუბრების ეტაპი დაიწყო. 9 ივნისს სამართლიანმა არჩევნებმა მერიას მიმართა განცხადებით, რომლითაც ითხოვდა კონკურსის გასაუბრების პროცესზე დამკვირვებლის სტატუსით დასწრებას. მოთხოვნაზე პასუხი მერიამ ორგანიზაციას დაგვიანებით, 29 ივნისს მიაწოდა. არასრულყოფილი პასუხის არაგონივრულ ვადებში მოწოდების გამო, "სამართლიან არჩევნებს" შეეზღუდა თბილისის მერიაში მიმდინარე კონკურსის გასაუბრების ეტაპზე დაკვირვების უფლება.
ეს არ არის პირველი შემთხვევა, როდესაც ორგანიზაციას კონკურსებისა და ატესტაციების, გასაუბრების ეტაპზე დაკვირვების შესაძლებლობა არ მიეცა. საჯარო მოხელეთა ატესტაციისა და კონკურსების პროცესის მონიტორინგის განმავლობაში, რომელიც „სამართლიანმა არჩევნებმა" 2014 წლის ოქტომბრიდან დაიწყო, ორგანიზაცია 14 თვითმმართველ ორგანოში სრულად ან საერთოდ ვერ დააკვირდა გასაუბრებებს", - აცხადებენ ორგანიზაციაში.
სამართლიანი არჩევნები მოუწოდებს თბილისის მერიას, ადგილობრივი თვითმმართველობის სხვა ორგანოებს და საკონკურსო-საატესტაციო კომისიებს, დროულად მოახდინონ დაინტერესებული სადამკვირვებლო ორგანიზაციების ინფორმირება დაგეგმილი კონკურსებისა და ატესტაციების პროცესების შესახებ და მისცენ სრულფასოვანი დაკვირვების საშუალება, რათა კითხვის ნიშნის ქვეშ არ დადგეს ატესტაციებისა და კონკურსების პროცესის სამართლიანობა და გამჭვირვალობა.