აშშ-ის ელჩი საქართველოში რიჩარდ ნორლანდი ხევსურეთში სტუმრობის შთბედილებაზე საუბრობს.
„მომავალ კვირას საქართველოდან მივემგზავრებით. გამგზავრების წინ მეღირსა და ხევსურეთში სტუმრობის პატივი მერგო. თბილისიდან მანქანით ხუთსაათიანი მგზავრობის შემდეგ, სოფელ კორშაში ჩავედით და შოთა არაბულისა და მისი მეუღლის ზარინას შესანიშნავ საოჯახო სასტუმროში ვისადილეთ, სადაც ჩიტებს ბუდე სამზარეულოში ჰქონდათ მოწყობილი. შემდეგ მაღლა, რუსეთის საზღვართან ახლოს, საოცარი მთებისკენ გავემართეთ. მუცოში ქეთის, „მუცოს პატარა დედოფალს“ შევხვდით. შატილში, დებმა გოგოჭურებმა საოცრად ჰარმონიული ხალხური სიმღერები გვიმღერეს. ვითევზავე პატარა მდინარეში, მაგრამ კალმახი ჩვენმა ქართველმა მეგობარმა დაიჭირა. ყველაზე შთამბეჭდავი შატილის კომპლექსის ერთ-ერთ უძველეს კოშკში გათენებული ღამე იყო. ხევსურეთის უძველესი დამცველები ასეთ შეუვალ კოშკებს აგებდნენ, რომ შემოჭრილი მტრისაგან თავი დაეცვათ. გვიამბეს წარსულის მძიმე ამბები, როცა ჭირშეყრილი ადამიანები მოსაკვდომად სოფლიდან მიდიოდნენ, რომ სხვებიც არ დაეავადებინათ. მამა კონსტანტინესთან ერთად დაბლობზე იმ სოფელს გავხედეთ, სადაც ის დაიბადა. სამწუხაროდ, რუსეთის საზღვარზე გამკაცრებული წესების გამო მამა კონსტანტინე მშობლიურ სოფელში ჩასვლას ვეღარ ახერხებს. ეს მთიანი მხარე უხსოვარი დროიდან ბუნებრივი სილამაზითა და მკაცრი გარემოთი გამოირჩევა. რამდენი რამაა აქ შესასწავლი და დასაფასებელი. მადლობა მამა გიორგისა და მის შესანიშნავ გუნდს ხევსურეთში სტუმრობის ორგანიზებისათვის." - აღნიშნავს რიჩარდ ნორლანდი წერილში, რომელსაც საელჩო facebook-ის საკუთარ გვერდზე აქვეყნებს.