კუს ტბაზე მომხდარი ინციდენტის კომენტირებისას ჯანდაცვის მინისტრი დავით სერგეენკომ იმედი გამოთქვა, რომ სიმართლე დროულად გაირკვევა.
"საქმეზე მიმდინარეობს გამოძიება და მოკვლევა, მჯერა, რომ ყველაფერი დროულად გაირკვევა და ყველაფერს თავისი სახელი დაერქმევა,"-განაცხადა ჟურნალისტებთან მთავრობის სხდომის დაწყებამდე დავით სერგეენკომ.
სერგეენკოს თქმით, ლიკა კიკიანის ჯანმრთელობის მდგომარეობის შესახებ საქმის კურსშია, თუმცა, მისივე განცხადებით, პაციენტის ჯანმრთელობის მდგომარეობის შესახებ ინფორმაცია კონფიდენციალურია და მისი ნებართვის გარეშე ინფორმაციას ვერ გაავრცელებს.
ლიკა კიკიანი, რომელიც მის ცემაში სამართალდამცველებს ადანაშაულებს, დღეს გენერალურ ინსპექციას და პროკურატურას მიმართავს. ის შემთხვევის ადგილზე მომხდარი ინციდენტის ამსახველი, სათვალთვალო კამერებით გადაღებული ვიდეო მასალის, მისთვის გადაცემას ითხოვს.
ლიკა კიკიანის ვარაუდით, სამართალდამცველები დროს შეგნებულად აჭიანურებენ იმისათვის, რომ ჩანაწერები ავტომატურ რეჟიმში წაიშალოს და მისი ამოღება ვერ მოხერხდეს. ჩანაწერების ავტომატურად წაშლის ბოლო ვადა დღეს საღამოს 17:00 საათია.
