ფიფას სტანდარტებით, ორვარსკვლავიანი ხელოვნურსაფარიანი სტადიონის მშენებლობა ქალაქ წყალტუბოში შეუფერხებლად მიმდინარეობს. სტადიონს საქართველოს რეგიონული განვითარებისა და ინფრასტრუქტურის სამინისტროს შ.პ.ს. „სახელმწიფო სამშენებლო კომპანია“ აშენებს.
ამ ეტაპისთვის უკვე აშენებულია გასახდელები და კაფე, წყლის რეზერვუარი და სატრანსფორმატორო. პროექტის ამ ნაწილში მხოლოდ შენობების მოპირკეთებისა და ღებვის სამუშაოებია განსახორციელებელი.
მოედნის ტერიტორიაზე ჩატარდა გრუნტის სამუშაოები,დატკეპნილია 600 კუბური მეტრი ქვიშა-ღორღი, ჩალაგდა და შესაბამის ქსოვილში შეიფუთა დრენაჟები; გაკეთებულია საძირკველი ბეტონის კარკასისთვის; დამაგრებულიაგანათების ბოძები და ანკერები. პროექტის ამ ნაწილში დარჩენილია მხოლოდ ხელოვნური საფარის მოწყობისა და აქსესუარების მონტაჟის სამუშაოები.
პარალელურად, მიმდინარეობს 800 კუბამეტრი გრუნტის დატკეპნა ავტოსადგომისთვის გამოყოფილ ტერიტორიაზე.
ახალი სტადიონის მშენებლობა წყალტუბოში 2014 წლის დეკემბერში დაიწყო და მისი დასრულება წელს იგეგმება. პროექტი ითვალისწინებს ხელოვნური საფარის დაგებას 7280კვადრატული მეტრი ფართობის მოედანზე და ავტოსადგომის მოწყობას 7960 კვადრატულ მეტრ ფართობზე.
წყალტუბოს ახალი სტადიონის მშენებლობა სახელმწიფო და მუნიციპალური ბიუჯეტებიდან ფინანსდება და მისი ღირებულება 2 მილიონი ლარია. სამუშაოებზე 34 ადამიანია დასაქმებული.
ახალი, ფიფას სტანდარტებით, ორვარსკვლავიანი სტადიონი მნიშვნელოვნად გააუმჯობესებს ქალაქის ინფრასტრუქტურას და ხელსშეუწყობსწყალტუბოშიფეხბურთის განვითარებას.
