გარდაბნის რაიონის სოფელ ახალ კუმისში ხანძრის შედეგად ათამდე მიტოვებული სახლი და დამხმარე ნაგებობები დაიწვა. ადგილობრივი მცხოვრებლების ინფორმაციით, ცეცხლი მაღალი ბალახის დაწვის შედეგად გაჩნდა.
მოსახლეობა იხსენებს, რომ 21-ე ქუჩაზე მცხოვრებმა ერთ-ერთმა ოჯახმა ეზოს ბალახისაგან გაწმენდის მიზნით მას ცეცხლი მოუკიდა, რის შედეგადაც ცეცხლი მთელ ტერიტორიაზე გავრცელდა. მათი ინფორმაციით, მაშველები ადგილზე რამდენიმე წუთში მივიდნენ.
მაშველებმა კუმისის ტერიტორიაზე ვერტმფრენით ცეცხლის ჩაქრობის სამუშაოები უკვე დაასრულეს. ადგილზე რჩებიან სახანძრო-სამაშველო ბრიგადების მანქანები, რომლებიც დარჩენილი ცეცხლის კერების ლიკვიდაციას ახორციელებენ.
გუბერნატორის განცხადებით, ხანძრის შედეგად მიყენებული ზარალის ოდენობას სპეციალური კომისია შესწავლის შემდეგ დაადგენს.
