შეერთებული შტატების სურსათისა და მედიკამენტების ადმინისტრაციის მიერ გამოქვეყნებული ცნობის მიხედვით, 400-მდე ყველაზე პოპულარული დასახელების ტუჩსაცხებში ტყვიის შემცველობა აღმოაჩინეს, მათ შორისაა: 1. Christian Dior 4 ; 2. LANCOME 2; 3. CLINIQUE 2; 4. Y.S.L 5; 5. ESTEE LAUDER 3; 6. SHISEIDO 2; 7. RED EARTH (Lip Gloss) 2; 8. CHANEL (Lip Conditioner) 2.
ტყვიის ტოქსიკური შემცველობისა და საფრთხეების შესახებ ”ჯი-ეიჩ-ენს” ტოქსიკოლოგი მანანა ჟურული ესაუბრება:
_ ტყვია ორგანიზმში საჭმლის მომნელებელი სისტემიდან ხვდება. როდესაც ის სხვა ნივთიერებასთან, მაგალითად, მჟავესთან, ურთიერთქმედებს, ძალიან საშიშია. ტყვია ძლიერი შხამია. ძველ დროში მისგან ფიალებს აკეთებდნენ, ვინმეს მოწამვლის მიზნით.
გასათვალისწინებელია, ტყვიის რომელი ნაერთია გამოყენებული ტუჩსაცხში, ორგანული ნაერთები უფრო მავნეა, არაორგანულთან შედარებით. თუ ტყვია მასში შესულია ისეთი ნაერთის სახით, რომელიც ტოქსიკურია, ეს, შეიძლება ითქვას, კრიმინალია. ტყვიისთვის უსაფრთხო დონე არ არსებობს. მცირე რაოდენობაც რომ შევიდეს ორგანიზმში დიდი ხნის განმავლობაში, ის ძვლებში დაგროვდება, ექსტრემალურ პირობებში კი გამოიყოფა და ორგანიზმი მოიშხამება. შეიძლება ტყვიის მოქმედება რამდენიმე ათეული წლის შემდეგაც გამოვლინდეს. არსებობს შემთხვევები, როცა მშობიარობისას გამოვლინდება ტყვიით ინტოქსიკაცია. ამ შემთხვევაში ის ნაყოფის თავის ტვინს აზიანებს, ტყვია არის ნეიროტოქსიკური შხამი, ამიტომაცაა რომ, როცა ჩვილი იზრდება, ხდება ჰიპერაქტიური, აგრესიული, გონებრივი პროცესების განვითარება შეფერხებული აქვს და ა.შ. ტყვიით მოწამვლა სიგიჟესაც იწვევს, მე მინახავს მსგავსი შემთხვევები.
_ როგორ ფიქრობთ, რატომ იყენებენ ტუჩსაცხში ტყვიისა და ლითონის მინარევებს?
_ შესაძლებელია, რომ ტყვია კონსერვანტად შეჰყავთ პომადაში, იმ მიზნით, რომ გაასუფთაონ მისი ხარისხი და დიდხანს შენარჩუნდეს ტუჩზე, ასევე ტყვიასა და ლითონს გააჩნია ის ბუნებრივი მინერალები, რაც ტუჩსაცხს ფერს აძლევს.
_ როგორ ხდება ტყვიით მოწამვლის დიაგნოსტიკა?
_ დიაგნოსტიკა იმისა, გვაქვს თუ არა შემთხვევა ტყვიით ინტოქსიკაციისა, ხდება ძალიან მარტივად, სისხლის ანალიზით. აქვე დავამატებ, რომ ადამიანებს, რომელთა სისხლშიც ტყვიის მაღალი შემცველობა აღმოაჩინეს, ძალიან დაბალი ინტელექტუალური კოეფიციენტი აქვთ.
საბოლოოდ, შეიძლება დავასკვნათ, რომ ძვირადღირებულობა და პოპულარობა არ არის გარანტი მაღალი ხარისხისა და როგორც დერმატოლოგები გვირჩევენ, აუცილებელია მათთან კონსულტაცია მანამ, სანამ რომელიმე კოსმეტიკურ საშუალებას მივანიჭებთ უპირატესობას.
