საქართველოს პარლამენტში, თბილისში, ათასწლეულის ინოვაციის კონკრუსის ფინალში, ინოვაციური პროექტებით გამარჯვებული გუნდების წარმომადგენლები პარლამენტის თავმჯდომარეს, დავით უსუფაშვილს შეხვდებიან.
ათასწლეულის ინოვაციის კონკურსი წარმოადგენს ათასწლეულის გამოწვევის ფონდი -საქართველოსა და აშშ-ის საელჩოს ერთობლივ პროექტს, რომელიც აშშ-ს კონრადის ფონდთან პარტნიორობით ხორციელდება. კონკურსი მიზნად ისახავს ახალგაზრდებსა და სკოლის მოსწავლეებში ინოვაციების, ტექნოლოგიებისა და გამოგონებების პოპულარიზაციასა და წახალისებას.
პარლამენტის ინფორმაციით, აღნიშნულ კონკურსში პირველ ადგილზე გასულმა გუნდმა ახალციხიდან მონაწილეობა მიიღო აშშ-ში, NASA-ს კენედის კოსმოსურ ცენტრში გამართულ ინოვაციების საერთაშორისო სამიტზე და განსაკუთრებული სტატუსის მქონე გუნდის სახით წარმოადგინა საქართველო.
საქართველოს პარლამენტში ვიზიტისას, ფინალში გასული გუნდების მონაწილეებისთვის ექსკურსია მოეწყობა, რომლის ფარგლებშიც ახალგაზრდები დაათვალიერებენ პარლამენტის ისტორიულ შენობას თბილისში და გაეცნობიან ქართული პარლამენტარიზმის ისტორიას,პარლამენტის სტრუქტურას, მისიასა და როლს, აგრეთვე, კანონშემოქმედებით პროცესს.