გასულ წელს სახალხო დამცველის ბავშვთა უფლებების ცენტრმა, საქმის წარმოება 417 ფაქტზე დაიწყო. მათ შორის არის საქმეები, რომლებიც ძალადობას უკავშირდება. ამის შესახებ სახალხო დამცველმა უჩა ნანუაშვილმა სასტუმრო „რედისონში“ განაცხადა, სადაც ბავშვთა უფლებებთან დაკავშირებით, სახალხო დამცველის ანგარიშს განიხილავენ.
როგორც ომბუდსმენმა შეხვედრის დაწყებამდე განაცხადა, ბავშვების მიმართ ძალადობა და არასათანადო მოპყრობა იდენტიფიცირებულია, როგორც ერთ-ერთი სერიოზული პრობლემა. მისი თქმით, საუბარია, როგორც ფსიქოლოგიურ, ასევე, ფიზიკურ ძალადობაზე.
„რაც მთავარია, ეს არის პრობლემა, რომლის იდენტიფიცირება გარკვეული მიზეზების გამო საკმაოდ რთულია. მნიშვნელოვანია, რომ ყველა ასეთ შემთხვევაზე მყისიერი რეაგირება იყოს. გასულ წელს სახალხო დამცველის ბავშვთა უფლებების ცენტრმა 417 საქმეზე საქმის წარმოება დაიწყო. მათ შორის არის საქმეები, რომლებიც ძალადობას უკავშირდება“, - განაცხადა უჩა ნანუაშვილმა.
მისივე თქმით, ანგარიშში ასახულია ასევე პრობლემები ჯანდაცვის უფლების რეალიზაციასთან, განათლებისა და სხვა საკითხებთან დაკავშირებით.
