მოსახლეობა მედიისგან სოციალური პრობლემების გაშუქებას ელის. ,,საერთაშორისო გამჭვირვალობა საქართველოს” კვლევის თანახმად, სოციალური პრობლემების გაშუქება 2013 წელთან შედარებით ჟურნალისტების მთავარ დანიშნულებად 11%-ით მეტ რესპონდენტს მიაჩნია (67%).
არასამთავრობო ორგანიზაციაში მიაჩნიათ, რომ მოსახლეობის მხრიდან სოციალური საკითხების გაშუქებისთვის ასეთი დიდი მნიშვნელობის მინიჭება, შეიძლება ლარის კურსის მკვეთრი ცვლილებით და ამ პროცესის პარალელურად ეკონომიკური საკითხების აქტუალურობით აიხსნას.
2013 წელს ორგანიზაციის მიერ CRRC-ისთვის დაკვეთილ საზოგადოებრივი აზრის გამოკითხვის შედეგებთან შედარებით, 7%-ით არის გაზრდილი იმ ადამიანების წილიც, ვინც თვლის, რომ ჟურნალისტები მოსახლეობას ინფორმაციას მთავრობის გადაწყვეტილებების შესახებ უნდა აწვდიდნენ.
თუმცა იმ ადამიანების რიცხვი (16%), რომლებიც ჟურნალისტების მოვალეობად მთავრობის კრიტიკას თვლიან, თითქმის არ შეცვლილა.
კვლავ ძალიან დაბალია და 3%-ს არ ცდება გამოკითხულთა რიცხვი, ვინც მიიჩნევს, რომ ჟურნალისტები ხელისუფლების ინტერესს უნდა ემსახურებოდნენ.
ასევე 2013 წლის კვლევის შედეგებთან შედარებით, შემცირებულია მათი რიცხვიც, ვინც თვლის, რომ ჟურნალისტები სოციალურ უთანასწორობას უნდა აშუქებდნენ.
საზოგადოებრივი აზრის გამოკითხვა „საერთაშორისო გამჭვირვალობა – საქართველოს“ დაკვეთით კავკასიის კვლევითი რესურსების ცენტრმა (CRRC) 2015 წლის 28 აპრილი-6 მაისის პერიოდში ჩაატარა. გამოკითხვის საშუალო ცდომილების ზღვარი 3.7%-ია.