საბერძნეთში განვითარებული მოვლენები უარყოფითად იქნება ასახული ქვეყანაში მყოფ საქართველოს მოქალაქეებზე. ამის შესახებ საგარეო საქმეთა სამინისტროს სპიკერმა დავით კერესელიძემ დღეს გამართულ ტრადიციულ ბრიფინგზე განაცხადა.
მისი თქმით, საბერძნეთი უკვე დიდი ხანია ეკონომიკურ კრიზისში იმყოფება, რაც შემაშფოთებელი ფაქტია.
„ახალი ხელისუფლების მოსვლის შემდეგ, არის მცდელობა, რომ ვალის გასტუმრებაზე ევროკავშირთან მოლაპარაკება მოხდეს. იცით, რომ 5 ივლისს საბერძნეთის პრემიერმა რეფერენდუმი დანიშნა. ქვეყანა დეფოლტის წინაშეა, რა თქმა უნდა, ფინანსურად ეს, არა მარტო იქ მყოფ საქართველოს მოქალაქეებზე, არამედ საბერძნეთის მთელ მოსახლეობაზე აისახება“, - განაცხადა დავით კერესელიძემ და დასძინა, რომ ეს ძალიან რთული პროცესია როგორც საბერძნეთის, ისე ევროკავშირისთვისაც.
საბერძნეთის ბანკები დღესაც დახურული იქნება. ხელისუფლება კაპიტალის მოძრაობას მკაცრად აკონტროლებს. ასევე დახურულია საფონდო ბირჟაც. დეფოლტისა და ევროზონის დატოვების ფონზე ქვეყნის პრემიერ-მინისტრი ალექსის ციპრასი მოსახლეობას სიმშვიდის შენარჩუნებისკენ მოუწოდებს და პირობას დებს, რომ მათ ანაბრებს საფრთხე არ ემუქრება. ხელისუფლების დაპირების მიუხედავად, საბერძნეთის მოსახლეობა პანიკამ მოიცვა. ადგილობრივ ბანკებთან რამდენიმე კვირის განმავლობაში გრძელი რიგები იდგა, რის გამოც ბანკებმა დროებით მუშაობა შეწყვიტა. იმ შემთხვევაში, თუ ათენი ხვალისთვის საერთაშორისო სავალუტო ფონდს მილიარდ 600 მილიონ ევროს არ გადაუხდის, ქვეყანას გარდაუვალი დეფოლტი ელის.
