4 თებერვალს 13.30 საათზე პოლონეთის რესპუბლიკის საგანგებო და სრულუფლებიანი ელჩი საქართველოში, ანჟეი ცეშკოვსკი, სააკაშვილის საპრეზიდენტო ბიბლიოთეკას ეწვევა და მიხეილ სააკაშვილის მიერ 2014 წლის 6 დეკემბერს მიღებულ გენერალ პულასკის თავისუფლების რაინდის ჯილდოს და ხმალს საზეიმო ვითარებაში ბიბლიოთეკის სამუზეუმო ექსპოზიციაში განათავსებს.
ვარშავაში მოქმედმა „კაზიმირ პულასკის ფონდმა" საქართველოს მესამე პრეზიდენტს - მიხეილ სააკაშვილს - „თავისუფლების რაინდის" ჯილდო 6 დეკემბერს მიანიჭა.
გენერალ პულასკის ფონდი „თავისუფლების რაინდის" ჯილდოს ყოველწლიურად გადასცემს: თავისუფლების, სამართლიანობისა და დემოკრატიისთვის ბრძოლაში განსაკუთრებული ღვაწლის გამღებ ცნობილ ადამიანებს.„თავისუფლების რაინდის" წოდებასა და ჯილდოსთან ერთად დაჯილდოვებულებს გადასცემენ გენერალ პულასკის ხმლის ხელნაკეთ ასლს, სწორედ ისეთს, როგორსაც ატარებდა პოლონელებისა და ამერიკელების თავისუფლებისთვის მებრძოლი, აშშ-ის დამოუკიდებლობისთვის ომში კონტინენტური არმიის გენერალი კაზიმირ პულასკი.
სხვა და სხვა დროს გენერალ პულასკის სახელობის „თავისუფლების რაინდის" ჯილდო გადაეცათ: პოლონეთის პრეზიდენტ ლეჰ ვალენსას, პოლონეთის პრეზიდენტ ალექსანდრ კვასნევსკის, ლიტვის პრეზიდენტ ვალდას ადამკუსს, ლატვიის პრეზიდენტ ვაირა ვიკე-ფრეიბერგას, აგრეთვე: ჰავიერ სოლანას, ბერნარ კუშნერს, რიჩარდ ლუგარს. ამ საპატიო სიას საქართველოს მესამე პრეზიდენტი მიხეილ სააკაშვილი დაემატა.
პოლონელებისა და ამერიკლების თავისუფლებისთვის მებრძოლ გამორჩეულ სამხედრო მოღვაწეს კაზიმირ პულასკის პოლონეთშიც და ამერიკის შეერთებულ შტატებშიც განსაკუთრებულ პატივს მიაგებენ. 2009 წლის 6 ნოემბერს პრეზიდენტმა ბარაკ ობამამ ხელი მოაწერა რეზოლუციას კაზიმირ პულასკისთვის ამერიკის შეერთებული შტატების საპატიო მოქალაქის წოდების მინიჭების თაობაზე. ეს პულასკის გარდაცვალებიდან 230 წლის შემდეგ მოხდა. ამ დიდ პოლონელ სამხედრო მოღვაწეს "ამერიკის კავალერიის მამას" უწოდებენ.