,,ნაცმოძრაობის" წევრი მიხეილ მაჭავარიანი 2014 წლის შეფასებისას მთავარ მიღწევად ევროკავშირთან ასოცირების ხელშეკრულების გაფორმებას ასახელებს. თუმცა ,,ჯი-ეიჩ-ენთან" საუბარში დეპუტატი განმარტავს, რომ ხელშეკრულება მხოლოდ ფარატინა ფურცელზე არ უნდა დარჩეს გაფორმებული და საქართველომ უნდა შეასრულოს ნაკისრი ვალდებულებები.
,,პირველ რიგში, პოზიტივით დავიწყებ და ვიტყვი, რომ ევროკავშირთან ასოცირების ხელშეკრულების ხელმოწერა საქართველოს უმნიშვნელოვანესია, მაგრამ ამ ყველაფერს რეალიზება უნდა და ნაკისრი ვალდებულებები უნდა შესრულდეს. კარგია, რომ წელს რთველი კარგად ჩატარდა, მაგრამ თუ მხოლოდ რუსულ ბაზარს ჩამოვეკიდებით მომავალ წელს ასეთი წარმატებული რთველი აღარ იქნება, რადგან ჩვენს მეწარმეებს რუსულ ბაზარზე პროდუქტის გაყიდვა უკვე უჭირთ. Aკარგია, რომ გაიხსნა რუსული ბაზარი, მაგრამ რუსული ბაზრის ნარკომანები არ უნდა გავხდეთ, რადგან კარგად ხედავთ რა რყევებია მათთან. ვფიქრობ, საყოველთაო ჯანდაცვის პროგრამის ამოქმედება კარგია, თუმცა მედიკამენტების დაფინანსებას პროგრამა არ ითვალისწინებს, რის გამოც საყოველთაო ჯანდაცვის პროგრამაში პრობლემებია"-განაცხადა მაჭავარიანმა, რომელიც ხელისუფლების ნეგატივზეც საუბრობს.
,,ეს იყო პოლიტიკურად ანგაჟირებული განცხადებები, უკან გადადგმული ნაბიჯი ეკონომიკაში, მოწმეთა დაკითხვის ინსტიტუტი, საყდრისში განვითარებული მოვლენები, პრობლემად მიმაჩნია იგივე პოლიტიკური დაკავებები და ვერ გამოვტოვებ ხელისუფლების დამოკიდებულებას უკრაინის მოვლენებისადმი", -განაცხადა მაჭავარიანმა ,,ჯი-ეიჩ-ენთან" საუბარში.
