ფარმაცევტული პროდუქტის მიმოქცევის სფეროში საქართველოს კანონმდებლობის აღსრულებისა და შესაბამისი სახელმწიფო პოლიტიკის განხორციელების უზრუნველყოფის მიზნით, სსიპ სამედიცინო საქმიანობის სახელმწიფო რეგულირების სააგენტოს მიერ ფარმაცევტული ბაზრის კონტროლის ღონისძიებების განხორციელების შედეგად გამოვლენილი იქნა 249 ადმინისტრაციული სამართალდარღვევის ფაქტი. როგორც ,,ჯი-ეიჩ-ენს" ჯანდაცვის უწყებიდან აცნობეს შემოწმებული 249 დაწესებულებიდან, 131 ფაქტი დაფიქსირდა პირველ ჯგუფს მიკუთვნებული ფარმაცევტული პროდუქტის ლეგალური ბრუნვის დადგენილი წესების დარღვევაზე, რაც შეადგენს 53%-ს.
შემოწმებული 249 დაწესებულებიდან, საქართველოს ზოგადი ადმინისტრაციული კოდექსის 61-ე მუხლის და საქართველოს კანონის ,,ლიცენზიებისა და ნებართვების შესახებ" 34-ე მუხლის მე-6 ნაწილის შესაბამისად, 2014 წელს ერთი კალენდარული წლის განმავლობაში გამოვლენილი სამართალდარღვევის გამო, რეგულირების სააგენტოს უფროსის ბრძანების საფუძველზე, ავტორიზებული აფთიაქის მოწყობის ნებართვა გაუუქმდა 11 აფთიაქს.
ჩამორთმევას და განადგურებას დაექვემდებარა აღრიცხვის დადგენილი წესის დარღვევით არსებული, საქართველოს ბაზარზე დაშვების უფლების არმქონე, ფალსიფიცირებული, წუნდებული, გაუვარგისებული, შენახვის პირობების დარღვევით არსებული და ვადაგასული 505045 ერთეული პირველი ჯგუფის და 245332 ერთეული მეორე და მესამე ჯგუფის ფარმაცევტული პროდუქტი.
2014 წლის 15 მარტიდან, ,,კოდეინის" შემცველი ფარმაცევტული პროდუქტი გადავიდა ნარკოტიკული საშუალებების ნუსხაში, ხოლო ეფედრინის, ფსევდოეფედრინისა და ნორეფედრინის შემცველი საშუალებები ფსიქოტროპულ ნივთიერებათა ნუსხაში, შედეგად ფარმაცევტულ დაწესებულებებში აღარ გვაქვს მათი უკანონო მიმოქცევა, ამასთან, სამართალდამცავი ორგანოებიდან მოწოდებული ინფორმაციით, 95% შემცირებულია კუსტარული ნარკოტიკული საშუალებების - ,,დეზომორფინი" (,,ნიანგი") და ,,ამფეტამინები" (,,ვინტი", ,,ჯეფი") მოხმარების გამოვლენა.
2014 წლის იანვარში, რეკლასიფიკაციის შედეგად მეორე ჯგუფიდან პირველ ჯგუფში გადავიდა 6 ნივთიერების (გაბაპენტინი, ბაკლოფენი, ტროპიკამიდი, ზალეპლონი, ზოპიკლონი და დექსტრომეტორფანი) შემცველი სამკურნალო საშუალებები. შედეგად, მათი იმპორტი, გასულ წელთან შედარებით შემცირებულია 70%-ით, შესაბამისად, შემცირებულია მათი უკანონო არხებში გადინებაც.