კაიროში, მამლუქ ამირ ალ-ტაზის ისტორიულ სასახლეში ეგვიპტეში საქართველოს საელჩოს, ეგვიპტის კულტურის სამინისტროსა და საქართველოს ხელნაწერთა ეროვნული ცენტრის ორგანიზებით ქართული დამწერლობის, საქართველოს ხელნაწერთა ეროვნულ ცენტრში დაცული ქართული და არაბული ხელნაწერების ფოტო გამოფენა გაიხსნა.
გამოფენა გახსნეს ეგვიპტეში საქართველოს ელჩმა, არჩილ ძულიაშვილმა, საქართველოს ხელნაწერთა ეროვნული ცენტრის დირექტორმა ბუბა კუდავამ და ამირ ალ-ტაზის დირექტორმა გამალ მუსტაფამ. გამოსვლებისას აღინიშნა, რომ საქართველოსა და ეგვიპტეს მჭიდრო ისტორიული და კულტურული ურთიერთობები აკავშირებთ. გამოფენაზე მყოფი ეგვიპტის საზოგადოების განსაკუთრებული ინტერესი გამოიწვია ქართულმა დამწერლობამ და საქართველოში დაცულმა არაბულმა ხელნაწერებმა.
გამოფენის გახსნაზე მოწვეულ სტუმრებს შორის იყვნენ კაიროში აკრედიტებული დიპლომატიური მისიების ხელმძღვანელები, ეგვიპტის ხელისუფლებისა და საზოგადოების, ასევე კულტურის სფეროს წარმომადგენლები.
გამოფენა მიმდინარე წლის 27 დეკემბრამდე გაგრძელდება. მეორე ეტაპზე გამოფენა ალექსანდრიის ბიბლიოთეკაში გაიმართება. გამოფენის შესახებ ინფორმაცია ფართოდ გაშუქდა ეგვიპტის ტელევიზიასა და პრესაში.