ოკუპირებული აფხაზეთის საგარეო საქმეთა მინისტრის მოადგილის ქაან ტანიას თქმით, საერთაშორისო სამართლის ნორმებიდან გამომდინარე, აფხაზეთის მოქალაქეებისთვის ვიზების გაცემის საკითხში პრობლემები არ უნდა არსებობდეს.
,,თუმცა, ევროკავშირი ყველა კანონის საწინააღმდეგოდ აცხადებს, რომ აფხაზეთის მოქალაქეებისთვის ვიზების გაცემას არ აპირებს და უარის საფუძვლად მის მიერ აფხაზეთის აუღიარებლობას ასახელებს. ეს მათი მხრიდან დისკრიმინაციული მიდგომაა." - აღნიშნავს ქაან ტანია.
ის განმარტავს, რომ ოკუპირებული აფხაზეთის დელეგაცია ჟენევის მოლაპარაკებებზე საერთაშორისო საზოგადოების მიერ აფხაზეთის მიმართ ხელოვნური ბარიერების აღმართვის საკითხს რეგულარულად აყენებს, რამაც გარკვეული შედეგები უკვე გამოიღო.
,,ჟენევის დისკუსიებზე ამ პრობლემის მუდმივმა განხილვამ შედეგი გამოიღო და ამერიკის შერთებული შტატების დელეგაციის ხელმძღვანელმა ერიკ რუბინმა ოფიციალურად განაცხადა, რომ სოხუმში გაცემული პასპორტების მქონე პირებისთვის აშშ ვიზების გაცემის წინააღმდეგი არ იქნება. აქედან გამომდინარე, მოვუწოდებთ ჩვენს ევროპელ კოლეგებს, მიჰყვნენ ამერიკელების პრაგმატულ გადაწყვეტილებას, რომლებმაც ფაქტობრივად, აფხაზეთში არსებული რეალობა აღიარეს." - განაცხადა ტანიამ.