აშკარაა, რომ სომხეთი და საქართველო არ გადადგამენ ისეთ ნაბიჯებს, რომლებიც ორმხრივ ურთიერთობას დააზარალებს. ამას მოწმობს მხარეთა განცხადება, რომლის თანახმად, სხვადასხვა ინტეგრაციულ კავშირებში გაწევრიანება ხელს არ შეუშლის და ბაიერებს არ შექმნის სომხეთ-საქართველოს მრავალდარგოვან ურთიერთობას, - ასეთი კომენტარი გაუკეთა ირაკლი ღარიბაშვილის ერევნულ შეხვედრებს პოლიტოლოგმა ალექსანდრე მარქარიანმა, წერს გამოცემა „პანოპრამა".
„ყოველი მხარე მაქსიმალურად შეეცდება ეფექტიურად გამოიყენოს ის ინტეგრაციული პროცესები, რომლებშიც ისინი მიიღებენ მონაწილეობას. ამ თვალსაზრისით სომხეთს, რასაკვირველია, საქართველოს პოზიცია აინტერესებდა, რადგან ტრანზიტს ჩვენთვის უდიდესი მნიშვნელობა აქვს", - აღნიშნა ექსპერტმა.
თავის მხრივ, სომხეთის პარლამენტის წევრმა მმართველი რესპუბლიკური პარტიიდან ხოსროვ არუთინიანმა ხაზი გაუსვა, რომ ქართულ-სომხური ურთიერთობა სომხეთის საგარეო პოლიტიკის პრიორიტეტად ითვლება და იმედი გამოხატა, რომ სომხეთთან დამოკიდებულება საქართველოსთვისაც ასევე მნიშვნელოვანია: „ჩვენი ურთიერთობის ბაზა ძალიან ფასეულია სახელმწიფოთაშორისო ურთიერთობების განვითარებისათვის. ჩვენთვის მნიშვნელოვანია, რომ საქართველომ რაიმე ბარიერი არ შეგვიქმნას საბაჟო კავშირსა და ევრაზიულ კავშირში გაწევრიანების გზაზე. ამას წინათ ამერიკელმა სენატორმა ჯონ მაკკეინმა უკმაყოფილება გამოხატა იმის გამო, რომ საქართველოს მთავრობამ რუსეთის წინააღმდეგ მიმართულ სანქციებს მხარი არ დაუჭირა. აშკარაა, რომ ოფიციალურმა თბილისმა უარი განაცხადა ანტირუსულ სანქციებში მონაწილეობაზე. ეს იმაზე მიუთითებს, რომ ქართული მხარე სერიოზულადაა შეშფოთებული იმით, რომ მისი პროდუქციისათვის რუსეთის და ევრაზიული კავშირის ქვეყნების ბაზარი არ დაიხუროს. ამ თვალსაზრისით სომხეთ-საქართველოს ეკონომიკური თანამშრომლობის გაღრმავება ორივე მხარისთვის მომგებიანია. სომხური კომპანიები თავიანთ ქართველ კოლეგებთან ტრადიციულ პარტნიორულ ურთიერთობას ყოველთვის მხარს დაუჭერენ და თუ ამას ევროკავშირთან ჩვენს სავაჭრო რეჟიმს - „GSP+"-ს დავამატებთ, მაშინ სურათი ნათელი გახდება: ამ რეჟიმის თანახმად, 7 ათასზე მეტი დასახელების სომხური პროდუქტი ევროკავშირის ბაზარზე ყოველგვარი საბაჟო პროცედურების გარეშე შევა და ამ შესაძლებლობით საქართველომ უნდა ისარგებლოს", - აღნიშნა დეპუტატმა.