პარლამენტის შესასვლელთან სამოქალაქო აქტივისტები აქციას მართავენ. ისინი ყოფილი გენერალური პროკურორის და ახლა გენერალური პროკურორობის კანდიდატის, ირაკლი შოთაძის კანდიდატურას აპროტესტებენ.
აქტივისტებმა პარლამენტის შესასვლელთან დადგმულ ჯებირზე პლაკატები და სიმბოლურად ფეხსაცმელები დაამაგრეს, როგორც ისინი განმარტავენ, ეს ირაკლი შოთაძის მიერ გაყალბებული საქმეების სიმბოლოა.
აქციის მონაწილეებმა განმარტეს, რომ კანცელარიაში უნდა ჩაებარებინათ იმ საქმეების სია, რომელიც გენერალური პროკურორობის კანდიდატის, ირაკლი შოთაძის მიერ არის „შეთითხნილი და გაყალბებული“.
„ჩვენ აქ ჭიდაობას არ ვაპირებთ. ფაქტია, რომ არ გვიშვებენ. გვაქვს სრული უფლება, პარლამენტში შევიდეთ, ვინაიდან ჩვენზე დილიდანვე არის დაშვებული საშვები. არ ვიყავით ვალდებული, განგვემარტა შიგნით შესვლის მიზეზი, თუმცა მაინც გამოვიჩინეთ კეთილი ნება. ჩვენ მიგვაქვს ბაინდერი, სადაც დევს ის საქმეები, რომელიც შოთაძის პროკურორობის პერიოდში იქნა გაყალბებული მის მიერ. არ გვიშვებენ, ვინაიდან პარლამენტის საშვთა ბიუროს აკონტროლებს სუსი და მათ მიერ არის მიღებული გადაწყვეტილება. რადგან არ გვიშვებენ, ვაპირებთ გარედან გავაპროტესტოთ. შოთაძე და ფარცხალაძე არის სიმბოლო ამ პროკურატურის და მათი სიმბოლო მთლიანად არის ბოტასები. მოვიტანეთ ბოტასები და ხალხს გვინდა შევახსენოთ, ვინ ინიშნება გენერალურ პროკურორად“, - განაცხადა სამართალდამცველთა რეფორმირების ცენტრის ხელმძღვანელმა ზვიად კუპრავამ
ყოფილი გენერალური პროკურორის და მთავარი პროკურორობის კანდიდატის, ირაკლი შოთაძის მოსმენა პარლამენტში 14 საათზეა დაგეგმილი, რომელიც, სავარაუდოდ, აქციის ფონზე ჩაივლის. სამოქალაქო აქტივისტები პარლამენტში შესვლას ითხოვდნენ, თუმცა დაცვამ ამისი საშუალება არ მისცა.
