წეროვანში დღეს, რეგიონში უპრეცენდენტო მნიშვნელობის, საქართველოს ეროვნული გმირის, მარო მაყაშვილის სახელობის სამხედრო მოსამსახურეთა სარეაბილიტაციო ცენტრი გაიხსნა.
ცენტრის მშენებლობა ამერიკის შეერთებული შტატების მთავრობამ 4.2 მლნ დოლარით დააფინანსა. საქართველოს მთავრობამ ცენტრის აღჭურვილობისთვის 1 მლნ ლარი დახარჯა.
ახალი ცენტრი აღჭურვილია ულტრათანამედროვე სარეაბილიტაციო და სამედიცინო ტექნიკით, რომელიც მნიშვნელოვნად გააუმჯობესებს დაჭრილი სამხედრო მოსამსახურეების ფიზიკურ და ფსიქოლოგიურ რეაბილიტაციას.
ცენტრის გახსნას ეხმიანება საქართველოში შეერთბული შტატების საელჩო.
"ამერიკის მთავრობა ამაყად დგას საქართველოს გამორჩეულად მამაცი სამხედროების გვერდით. ისინი შინ და გარეთ მშვიდობასა და უსაფრთხოებას უწყობენ ხელს.
დღეს დაჭრილი ჯარისკაცების პროგრამამ, რომელიც უმნიშვნელოვანესია დაშავებულ სამხედროებზე ზრუნვისთვის, ახალ ეტაპს მიაღწია.
ამერიკის მთავრობის $4.2-მილიონიანი გრანტით 2,000 კვადრატულ მეტრზე გაშენდა სარეაბილიტაციო ცენტრი. აქ თავმოყრილია ყველა აუცილებელი სივრცე, აღჭურვილობა და მომსახურება, რომელიც მებრძოლებს გამოჯანმრთელებისთვის ესაჭიროებათ. ძალა ერთობაშია!", - ნათქვამია საელჩოს განცხადებაში.
ფოტო: აშშ-ის საელჩო