თურქეთის საკონსტიტუციო სასამართლომ Wikipedia-ის აკრძალვა გამოხატვის თავისუფლების შეზღუდვად მიიჩნია. იტყობინება Euronews-ი.
სასამართლოსვე გადაწყვეტილებით, აკრძალვა უახლოეს დღეებში უნდა მოიხსნას, რათა თურქმა მომხმარებლებმა ონლაინ ენციკლოპედიით დაუბრკოლებლად სარგებლობა შეძლონ.
თურქეთის მთავრობამ ქვეყანაში Wikipedia 2017 წლის აპრილში აკრძალა. საქმე ეხებოდა ონლაინ ენციკლოპედიაში არსებულ სტატიას, სადაც ნათქვამი იყო, რომ თურქეთი ისლამურ სახელმწიფოსა და სხვა ტერორისტულ დაჯგუფებებს უჭერდა მხარს.
ანკარამ სტატიის დაუყოვნებლივ წაშლა მოითხოვა, რაზედაც Wikipedia-მ უარით უპასუხა.
ამის შემდეგ, მთავრობამ იხელმძღვანელა 3 წლით ადრე მიღებული კანონით, რაც საშუალებას აძლევს მას დაბლოკოს ყველა ვებგვერდი, რომელიც მათი შეხედულებით, თურქეთის ეროვნულ უსაფრთხოებას უქმნის საფრთხეს.
თურქეთის საკონსტიტუციო სასამართლოს გადაწყვეტილებას ვიკიპედიის დამფუძნებელი ჯიმი უელსი გამოეხმაურა და მიკრობლოგ „ტვიტერზე“ დაწერა: "კეთილი იყოს ჩვენი დაბრუნება თურქეთში!".
მთავრობის მხრიდან ოფიციალური კომენტარი ჯერ არ გაკეთებულა.