საზოგადოებაში მის შესახებ უამრავი ურთიერთგამომრიცხავი აზრი იკვეთება: გაისმის მისი უზომო ქებაც და უზომო კიცხვაც. ზოგისათვის იგი სამშობლოსათვის თავდადებულ გმირია, ზოგისათვის კი - ქვეყნის მოღალატე და პატივმოყვარე კარიერისტია.
რამდენად შეესაბამებოდა ქართველთა ეროვნულ ინტერესებს გიორგი სააკაძის მიერ გატარებული პოლიტიკა? ამის გასარკვევად 14 დეკემბერს შედგა სტუ-ს სამართლისა და საერთაშორისო ურთიერთობების ფაკულტეტის სასწავლო-სამეცნიერო კვლევითი პროექტის "პოლიტიკა სამსჯავროზე" სასკოლო ფორმატის ფარგლებში იმიტირებული სამსჯავრო.
ნახევარფინალში გადასასვლელად ერთმანეთის პირისპირ წარსდგა: ბრალდების მხარე, ზუგდიდის მეცხრე საჯარო სკოლის უფროსკლასელების გუნდი "ფასცია" და დაცვის მხარე, გიმნაზია "შავნაბადა"-ს" უფროსკლასელების გუნდი "თოტი".
მიუხედავად იმისა, რომ ზუგდიდიდან ჩამოსულმა ულამაზესმა "შვიდმა კოლხმა ამორძალმა" ბევრ პარამეტრში თავი ბრწყინვალედ გამოავლინა, საყოველთაო სიმპათია დაიმსახურა და მრავალი გულშემატკივარიც შეიძინა, გამოუცდელობამ თავისი ჰქნა და ნაფიც მსაჯულთა მიერ შეფასების კრიტერიუმების მიხედვით შევსებული ქულების შეჯამებამ სულ მცირე უპირატესობით შემდეგ ეტაპზე გაიყვანა გიმნაზია "შავნაბადა"-ს" უძლიერესი გუნდი "თოტი“.
ზუგდიდელების შემადგენლობაში იყვნენ: ნინო გელენავა (კაპიტანი); მაგდა კვიკვინია; მერი კვინჩია; ანა ნაჭყებია; ვიკა შენგელია; კესო ჩოკორაია; მარიამ წურწუმია. გუნდის მენტორები: მოწვ. ლექტორი ლევან ანთია - პოლიტიკისა და საერთაშორისო ურთიერთობების მიმართულებით; უფრ. მასწავლებელი მათე ჭანტურია - სამართლის მიმართულებით. სკოლის პედაგოგი: სოფო როგავა; სტუდენტი მენტორი - მარიამ ნოზაძე.
გიმნაზია "შავნაბადა"-ს წარმოადგენდა: მარიამ ბოკუჩავა (კაპიტანი); დეა ანთიძე; თეკლა ბენაშვილი; ნინი გოგლიძე; თამარ იმერლიშვილი; ნიკა ოტიაშვილი; ლიზი შამათავა. გუნდის მენტორები: პროფ. ნუგზარ დურმიშიძე - პოლიტიკისა და საერთაშორისო ურთიერთობების მიმართულებით; პროფ. ასისტ. სოფო დემეტრაშვილი - სამართლის მიმართულებით. სკოლის პედაგოგი: მაკო (ციალა) ჩიტია; სტუდენტი მენტორი: ანა ნაკაშია.
როგორც პროექტის ავტორმა და ხელმძღვანელმა, პოლიტიკის მეცნიერებათა დოქტორმა, პროფესორმა ჰენრი კუპრაშვილმა განაცხადა: ზუგდიდელებმა მცირედით დათმეს მხოლოდ შეფასების კრიტერიუმში "მხარეთა პაექრობა" (კითხვა-პასუხი). სამაგიეროდ ტოლი არ დაუდეს მეტოქეებს დანარჩენ კრიტერიუმებში:
1. გავლილი მასტერკლასების (ტრენინგების) ათვისების, კვლევითი მუშაობის, არქივებში, ბიბლიოთეკებსა და სამეცნიერო კატალოგებში მოძიებული წყაროების, სხვა მასალების, მტკიცებულებებისა და სანდო ინფორმაციის ანალიზისა და გამოყენების უნარი;
2. სახელმწიფო (ეროვნული) ინტერესების კრიტერიუმებისა და პარამეტრების, ასევე საკუთარი პოზიციის მყარად არგუმენტირების უნარი;
3. სასამართლო პროცესზე მონაწილეობის უნარ-ჩვევა, ასევე, საჯარო გამოსვლისა და დებატების ხელოვნება; ქცევისა და ურთიერთობის ეთიკა; გუნდურობა და სხვ. ზუგდიდიდან მე-9 საჯარო სკოლა პირველია, რომელმაც მონაწილეობა მიიღო ამ პრესტიჟულ და ავტორიტეტულ პროექტში და ბევრი გულშემატკივარიც შეიძინა დედაქალაქში.
მზადების პროცესში დიდი შრომა ჩადეს როგორც მონაწილე უფროსკლასელებმა, ასევე მათმა პედაგოგმა სოფო როგავამ, სკოლის დირექტორმა თეა გაბელაიამ. ისიც უნდა აღინიშნოს, რომ მოსწავლეებს მხარში ამოუდგა სამეგრელო-ზემო სვანეთის რწმუნებული და ზუგდიდის მუნიციპალიტეტის მერია, რომელმაც თბილისში გამოსამგზავრებლად მიკროავტობუსიც კი გამოუყო ბავშვებს. მათაც ნამდვილად არ შეურცხვენიათ სკოლა. ამ პროექტს წაგებული არ ჰყავს, რადგან მოსწავლეები დიდ ცოდნასა და სასარგებლო უნარ-ჩვევებს იძენენ.
მიუხედავად იმისა, რომ პროექტის სახელწოდებაში ტერმინი „პოლიტიკაა“ გაჟღერებული პროექტის მიზნები და ამოცანები სრულიად აპოლიტიკურია და გამორიცხავს მიმდინარე პოლიტიკურ-პარტიულ პროცესებთან პიროვნული თუ ორგანიზაციული სახით რაიმე შეხებას.
პროექტი, მოიცავს მხოლოდ სასწავლო-სამეცნიერო კვლევით პროცესს, სტუდენტები (უფროსკლასელები) იკვლევენ თუ რამდენად შეესაბამებოდა ცნობილი პოლიტიკური პირების (პოლიტიკური პარტიების) გატარებული პოლიტიკა ქვეყნის ეროვნულ ინტერესებს, შედეგების განსჯა კი ხდება იმიტირებულ სამსჯავროზე.
იმიტირებული სასამართლო პროცესი გამოყენებულია, როგორც სტუდენტების (მოსწავლეების) მიერ შეძენილი მრავალმხრივი ცოდნისა და უნარების საინტერესოდ და სრულყოფილად გადმოცემის თვალსაჩინო და ეფექტური საშუალება, რომელსაც აფასებს კვალიფიციური ჟიური (ნაფიცი მსაჯულნი).