„საქართველოს ფსიქიატრთა საზოგადოებამ“ 2019 წლის შედეგები შეაჯამა. ყრილობაზე, რომელშიც საქართველოს სხვადასხვა ქალაქიდან და რეგიონიდან მოწვეული 120 დელეგატი მონაწილეობდა, შეაფასეს ფსიქიკური ჯანდაცვის სფეროს გამოწვევები და სამომავლო განვითარების პრიორიტეტები, ასევე სტაციონარული და ჰოსპიტალური მომსახურების ხარისხი, პროფესიული განათლების საკითხები და ფსიქიატრიული სერვისების რეგიონალური საჭიროებები.
„ჩვენ შევიკრიბეთ იმისთვის, რომ ერთმანეთისთვის გაგვეზიარებინა ჩვენი შეხედულებები და ერთობლივი ძალისხმევით გადაგვეწყვიტა არსებული გამოწვევები. რა თქმა უნდა, კარგად გვაქვს გაცნობიერებული, რომ თანამედროვე ფსიქიკური ჯანდაცვის სერვისების შექმნა არის როგორც სამედიცინო, ასევე საზოგადოებრივი პრობლემაც და ვცდილობთ, მაქსიმალურად თანმიმდევრულად და სისტემურად მივუდგეთ ამ საკითხებს. ბევრი რამ გაკეთებულია, ბევრი რამ გასაკეთებელია და გვაქვს იმედი, რომ სათანადოდ მიექცევა ყურადღება“, - განაცხადა „საქართველოს ფსიქიატრთა საზოგადოების პრეზიდენტმა“ ეკა ჭყონიამ.
ფსიქიატრთა შემაჯამებელ ყრილობაში მონაწილეობდა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე თამარ გაბუნია, რომელმაც დარგის სპეციალისტებს სამინისტროს მოსაზრებები და სამომავლო ინიციატივები გააცნო.
თამარ გაბუნია: „რაც შეეხება სამინისტროს პრიორიტეტებს და ხედვას ფსიქიკური ჯანმრთელობის სამომავლო მოდელთან დაკავშირებით, ეს არის მოდელი, რომელიც დაემყარება სათემო სერვისებს და მაქსიმალურად გამოიყენებს იმ შესაძლებლობებს, რომელიც არსებობს ამბულატორიულ დონეზე მობილური ბრიგადების სახით. ასევე მნიშვნელოვანია ჰოსპიტალური სერვისის გაუმჯობესება და იმ ინფრასტრუქტურის შექმნა, რაც გვჭირდება მწვავე პროგრამების მართვისთვის“.
„საქართველოს ფსიქიატრთა საზოგადოებამ“ შეიმუშავა რეზოლუცია, რომელშიც შეფასებულია ფსიქიკური ჯანდაცვის სისტემაში არსებული გამოწვევები და ის აქტივობები, რომელთა განხორციელება ხელს შეუწყობს დარგის სამომავლო განვითარებას.