სრულად მაჟორიტარულ სისტემაზე გადასვლასთან დაკავშირებით კანონპროექტი ამ პარლამენტში მხარდაჭერას ვერ მოიპოვებს და 2024 წელს ქვეყანა პროპორციულ სისტემაზე გადავა, - განაცხადა საპარლამენტო უმრავლესობის ლიდერმა მამუკა მდინარაძემ უმრავლესობის სხდომის დასრულების შემდეგ, რომელიც "ქართული ოცნების" ცენტრალურ ოფისშო მიმდინარეობდა.
"საქართველოს პარლამენტში კონსტიტუციური ცვლილებების რესურსი არ არსებობს, მით უმეტეს, როცა ეს შეეხება სრულად მაჟორიტარულ სისტემაზე გადასვლას", - განაცხადა მდინარაძემ.
უმრავლესობის სხდომაზე განსახილველი ერთ-ერთი საკითხი საარჩევნო სისტემა იყო, მათ შორის ე.წ. ამერიკულ საარჩევნო მოდელთან დაკავშირებით მაჟორიტარი დეპუტატების ნაწილის ინიციატივა.
11 მაჟორიტარი, რომლებმაც პროპორციულ საარჩევნო სისტემაზე გადასვლას მხარი არ დაუჭირეს, ახლა შერეული სისტემის გაუქმებასა და 2020 წლის შემდეგ სრულად მაჟორიტარული სისტემის ამოქმედებას ითხოვს.